Kaattariyilla kadalariyilla | Vayalar |Devarajan | AM Rajah

വയലാർ ദേവരാജൻ ടീം ഒരുക്കിയ ഉള്ളുരുക്കുന്ന ഒരു വിലാപഗാനം...... Credits: Singer: Ramdas Madhavam Audio Mixing and Mastering: Deepak Varma Video editing: Meenakshi Mohan Description: Dr Suja A N Original Credits: Song: Kattariyilla kadalariyilla ( കാറ്ററിയില്ല കടലറിയില്ല) Movie: Jail (1966) Singer: AM Rajah Lyricist: Vayalar Rama Varma Music Director: G Devarajan തോപ്പിൽ ഭാസി കഥയും തിരക്കഥയും സംഭാഷണവും എഴുതി കുഞ്ചാക്കോ സംവിധാനം ചെയ്ത് 1966 ൽ റിലീസായ ചിത്രമാണ് ജയിൽ. സത്യൻ, ശാരദ, രാജശ്രീ ( ഗ്രേസി), അടൂർഭാസി, കവിയൂർ പൊന്നമ്മ തുടങ്ങിയവരഭിനയിച്ച ഈ ചിത്രത്തിന് ഗാനങ്ങളൊരുക്കിയത് വയലാറും ദേവരാജനുമാണ്. എ. എം. രാജ , യേശുദാസ്, സുശീല, ജാനകി, ജയചന്ദ്രൻ, എൽ. ആർ. ഈശ്വരി, പി. ബി. ശ്രീനിവാസ് എന്നിവരായിരുന്നു ഗായകർ. ഇതിലെ എട്ടുപാട്ടുകളിൽ, മുന്നിൽ മൂകമാം ചക്രവാളം, കാറ്ററിയില്ല കടലറിയില്ല എന്നീ പാട്ടുകൾ അതിൻ്റെ തത്ത്വചിന്താപരമായ ഉള്ളടക്കത്താലും വിലാപഭാവത്താലും ശ്രോതാക്കളുടെ ഹൃദയങ്ങളിൽ കൊത്തിവയ്ക്കപ്പെട്ടവയാണ്. എ. എം. രാജ പാടി അനശ്വരമാക്കിയ കാറ്ററിയില്ല എന്ന ഗാനമാണ് ഇവിടെ അവതരിപ്പിക്കുന്നത്. കമ്യൂണിസ്റ്റ് പാർട്ടി പ്രവർത്തകനും ഒപ്പം തന്നെ തികഞ്ഞൊരു കലാകാരനുമായിരുന്ന തോപ്പിൽ ഭാസി തൻ്റെ നാടകങ്ങളിലും സിനിമകളിലും ദരിദ്രൻ്റേയും അടിച്ചമർത്തപ്പെടുന്നവൻ്റേയും ശബ്ദമാകാനാണ് എക്കാലവും ശ്രമിച്ചിട്ടുള്ളത്. ദാരിദ്ര്യം കൊണ്ടു മാത്രം കള്ളനെന്നു മുദ്ര കുത്തപ്പെടുകയും പിന്നീട് കള്ളനും കൊലപാതകിയുമായിത്തീരുകയും ചെയ്യുന്ന ഒരു സാധാരണക്കാരൻ്റെ കഥയാണ് ഈ സിനിമ വരച്ചുകാട്ടുന്നത്. ഒരല്പം സഹാനുഭൂതി സമൂഹം കാണിച്ചിരുന്നെങ്കിൽ അയാളുടെയും അയാളുടെ കുടുംബത്തിൻ്റേയും ജീവിതമൊരു ദുരന്തമായിത്തീരില്ലായിരുന്നുവെന്ന് ഈ സിനിമ കാണിച്ചുതരുന്നു. സിനിമയിലെ സത്യൻ അവതരിപ്പിക്കുന്ന നായക കഥാപാത്രം , ദാരിദ്ര്യവും, കള്ളനെന്ന പരിഹാസവും, ഒറ്റപ്പെടലുമെല്ലാം നിമിത്തം ഒരു ദുഃഖക്കടൽ ഉള്ളിൽ പേറുന്നവനാണ്. തോറ്റവനെ, ദരിദ്രനെ, ദുഃഖിതനെ എല്ലാം കൂടുതൽ ചവിട്ടിത്താഴ്ത്തുന്ന, തെല്ലു പോലും കരുണ കാണിക്കാത്ത മനുഷ്യരാണ് ഭൂരിഭാഗവുമെന്ന് സിനിമ തരുന്ന സന്ദേശത്തിന്, ഈ ഗാനത്തിലൂടെ വയലാർ അടിവരയിടുന്നു. അനവരതം ഇരമ്പി അലയുന്ന തിരമാലകൾ കടലിൻ്റെ തീരാത്ത വേദനയുടെ പ്രതിഫലനമെന്നാണ് കവി ഭാഷ്യം. മനുഷ്യ മനസ്സിലെ സംഘർഷങ്ങളേയും ദുഃഖങ്ങളേയും വിവരിക്കാൻ അലതല്ലുന്ന തിരമാലകളേക്കാൾ കൃത്യമായ ഏതൊരു ദൃഷ്ടാന്തമാണ് ഈ ഭൂമിയിലുള്ളത്! കടലിൻ്റെ കരൾ നീറിപ്പുകഞ്ഞിട്ടാണ് നീരാവി പൊങ്ങുന്നതെന്ന കവിഭാവന കടൽ പോലെ അപാരം! മനുഷ്യൻ സഹിക്കേണ്ടി വരുന്ന ദുഃഖത്തിൻ്റെ ആഴവും കാഠിന്യവും അനുഭവിപ്പിക്കുന്നതിനൊപ്പം, പരിഹാരമായി നടത്തുന്ന തീർത്ഥയാത്രകളുടെ അർത്ഥരാഹിത്യവും കൂടി മനസ്സിലാക്കിത്തരുന്നു വയലാർ. ഓരോ ഗാനത്തിനും അതിൻ്റെ ആത്മാവു കണ്ടറിഞ്ഞു ഈണം നൽകുന്ന ദേവരാജൻ്റെ രീതി ഇതിലും പ്രകടമാണ്. ആഴത്തിൽ മുറിവേറ്റ ഒരു മനുഷ്യ മനസ്സിൻ്റെ വേദന അലയടിച്ചുയരുകയാണ് ഈ ഗാനത്തിലങ്ങോളമിങ്ങോളം. എ എം രാജ യുടെ ഭാവപൂർണ്ണമായ ആലാപനം ഈ ഗാനത്തെ കൂടുതൽ മനോഹരമാക്കുന്നു. തമിഴ്നാടു സ്വദേശിയാണെങ്കിലും ആദ്യകാല മലയാള സിനിമാഗാനരംഗത്തെ അവിഭാജ്യ ഘടകം തന്നെയായിരുന്നു രാജ. അദ്ദേഹത്തിൻ്റെ മധുരമൂറുന്ന, അല്പം കൊഞ്ചൽ കലർന്ന ആലാപനശൈലിയും ഗാനങ്ങൾക്ക് നൽകുന്ന ഭാവവും മലയാള ഗാനാസ്വാദകർക്ക് അദ്ദേഹത്തെ പ്രിയങ്കരനാക്കി. ഈ ഗാനവും രാജയുടെ മുദ്ര പതിഞ്ഞതു തന്നെ.