ၾႃႉလမ်သုမ်ႇမိူင်း တွၼ်ႈ 13 #ၾႃႉလမ်သုမ်ႇမိူင်း #သဵင်တႆး #mkaudiobook

ၾႃႉလမ်သုမ်ႇမိူင်း တွၼ်ႈ 13 ၼႆႉ ပဵၼ်လွင်ႈၸဝ်ႈၵျႃႇသႅင် ၶုၵ်းၶူၼ်ႉဝူၼ်ႉၶိုၼ်း လွင်ႈဝၼ်းလင် ဝၢႆးသေလႆႈထုၵ်ႇသိုၵ်းမၢၼ်ႈတီႉၺွပ်းၵႂႃႇ ၽွင်းၼေႇဝိၼ်းသိမ်းဢၢမ်းၼၢတ်ႈ မိူဝ်ႈၼႂ်းလိူၼ်မၢတ်ႉၶျ် ဝၼ်းထီႉ 2 ပီႊ1962 ၽွင်းၼၼ်ႉ သိုၵ်းမၢၼ်ႈတီႉၺွပ်းဢဝ် ၶုၼ်ၽွင်းလူင်တင်းၸုမ်း ၸဝ်ႈၾႃႉလၢႆလၢႆၸဝ်ႈလႄႈ တူဝ်တႅၼ်းသၽႃးတင်းၼမ်သေ ၵုမ်းၶင်ဝႆႉလူၺ်ႈဢမ်ႇၸွမ်းတြႃးၼၼ်ႉယူႇယဝ်ႉ။ ၼွၵ်ႈၼၼ်ႉ တေလႆႈႁၼ်ပႃးလၢႆးမိူၵ်ႈလိူင်းသိုၵ်းမၢၼ်ႈၶဝ် ဢၼ်ဢဝ်ၶေႃႈဢၢင်ႈလၢႆလၢႆမဵဝ်းသေ ၽိုတ်ႉၸိမ်ၶဝ်ႈမႃးယႃႉၵဝ်းၼႂ်းမိူင်းတႆး လၢႆလၢႆပိုၼ်ႉတီႈ၊ ပေႃးထိုင်ပိုၼ်ႉတီႈသၼ်လွႆယဝ်ႉၼႆၵေႃႈ ၶီႇမၢပ်ႇပေႉၵိၼ်ၵူၼ်းမိူင်းသၼ်လွႆ ႁဵတ်းႁၢႆႉမိူၵ်ႈလိူင်းတေႃႇၵူၼ်းမိူင်းတႆးၶဝ်ၼၼ်ႉ တေလႆႈႁၼ်ၸဵမ်မိူဝ်ႈပၢၼ်ၼၼ်ႉမႃးၼႆ ၼႂ်းတွၼ်ႈၼႆႉပႃးဝႆႉၼင်ႇၼႆ။ ပပ်ႉၾႃႉလမ်သုမ်ႇမိူင်း ပဵၼ်ပပ်ႉပိုၼ်းဢၼ်ပဵၼ်တႄႉမီးတႄႉ တူဝ်ထူပ်းတႃႁၼ်ၶွင် ၸဝ်ႈၼၢင်းသူႉၸၼ်ႇတီႇ ဢၼ်ပဵၼ်ၼၢင်းၶၢင်းၶိင်း ၸဝ်ႈၾႃႉသီႇပေႃႉ ပႅၵ်ႉသမ်ႉဝႃႈ မၼ်းၼၢင်းပဵၼ်ၵူၼ်းမိူင်းဝၼ်းတူၵ်းၼႆသေတႃႉၵေႃႈ ၸႂ်ၽုၵ်ႇၽင်ဢၼ်မီးတေႃႇၸိူဝ်ႉၶိူဝ်းတႆးလႄႈ လွင်ႈတုၵ်းယွၼ်းမၢၼ်ႇမႅၼ်ႈဢၼ်ၸဝ်ႈၵျႃႇသႅင်ႁၢႆလၢႆၵႂႃႇ ၽွင်းသိုၵ်းမၢၼ်ႈၼေႇဝိၼ်းသိမ်းဢႃႇၼႃႇမိူင်းမၢၼ်ႈပွၵ်ႈဢွၼ်တၢင်းသုတ်းၸိူဝ်းၼၼ်ႉသေ ၸင်ႇလႆႈပဵၼ်မႃး ပပ်ႉၾႃႉလမ်သုမ်ႇမိူင်းယူႇယဝ်ႉ။ ပပ်ႉငဝ်ႈတိုၼ်းတႅမ်ႈဝႆႉပဵၼ်ၽႃႇသႃႇဢင်းၵိတ်း ၽၢႆႇတႆးပဵၼ်ၶုၼ်ယုင်းၶဵဝ် ပိၼ်ႇတႅမ်ႈဝႆႉသေ တေႃႈလဵဝ် ပိၼ်ႇတႅမ်ႈဝႆႉမီးၽႃႇသႃႇ ထႆး လႄႈ မၢၼ်ႈပႃးယူႇယဝ်ႉ။