Kiko Bo Tin Bisti?-Podcast | Birando e vershon di bo mes ku bo no konosé ainda ft. Samiah Booi

Tin bia kresementu ta kuminsá dor di eksplorá un vershon di bo mes, ku bo mes no a sera konosí ku ne ainda. Di pafó e mundu di beyesa por mustra bunita yen di bistínan nechi, i koronanan impresionante. Pero tras di tur esaki tin hopi mas: disiplina, kurashi, vulnerabilidat i e abilidat pa adaptá na situashonnan nobo, asta ora nos no ta sinti nos mes masha kómodo. Den e episodio aki, Samiah (Miss International 2026 Curaçao i tambe first runner-up Miss Universe 2025) ta kompartí su eksperensia i kon e trayekto aki a pone ku el a konosé su mes na un otro manera i kambia su rumbo pa algu otro. Algu ku a pas mas ku ne. Kuantu nos tabata sa kaba di nos mes? I kuantu mas nos lo bin haña sa di nos mes, ora nos tin djis e kurashi pa hasi algu diferente? Por ta asina ku, pa nos por krese, nos mester laga bai di sierto pensamentu i ideanan ku nos tabata tin di nos mes, pero ku awor e konvikshonnan aki no ta kuadra mas ku e persona ku nos ta awe? I kiko nos lo mester kambia e ora ei pa biba nos bida i hasi eskohonan ku ta kuadra mas ku e persona ku nos ta awe?