ಮಂತ್ರಾಲಯ ಶ್ರೀಗಳ ಸಮ್ಮುಖದಲ್ಲಿಸಂಕೀರ್ತನಾ ಸೇವೆಯ ಸೌಭಾಗ್ಯ, ಶ್ರೀ ರಾಮಕೃಷ್ಣ ಕಾಟುಕುಕ್ಕೆ ಮತ್ತು ಶಿಷ್ಯವರ್ಗ.🙏

500 ಕ್ಕೂ ಹೆಚ್ಚು ಮಂದಿ | ಮಂತ್ರಾಲಯ ಶ್ರೀ ರಾಘವೇಂದ್ರ ಸ್ವಾಮಿಗಳ ಸನ್ನಿಧಿಯಲ್ಲಿ ಒಂದು ಅಪರೂಪದ ಭಜನಾ ಸೇವೆಯ ಸೌಭಾಗ್ಯ 🙏 ಮಂತ್ರಾಲಯದ ಪವಿತ್ರ ಕ್ಷೇತ್ರದಲ್ಲಿ, ಯತಿವರೇಣ್ಯ ಪರಮಪೂಜ್ಯ ಶ್ರೀ ಶ್ರೀ ಶ್ರೀ ಸುಬುಧೇಂದ್ರ ತೀರ್ಥ ಶ್ರೀಗಳ ಸಮ್ಮುಖದಲ್ಲಿ, ಮಧ್ವಾಧೀಶ ವಿಠಲದಾಸ ನಾಮಾಂಕಿತ ಶ್ರೀ ರಾಮಕೃಷ್ಣ ಕಾಟುಕುಕ್ಕೆ ಹಾಗೂ ಅವರ 500ಕ್ಕೂ ಹೆಚ್ಚು ಶಿಷ್ಯರ ತಂಡದಿಂದ ನಡೆದ ಸಂಕೀರ್ತನಾ ಸೇವೆ ಭಕ್ತಿಭಾವದ ಅಪೂರ್ವ ಅನುಭವವಾಗಿ ಮೂಡಿಬಂತು. 20-09-2026ರಂದು, ಜಗನ್ನಾಥದಾಸರ ಆರಾಧನಾ ದಿನದಂದೇ ಈ ವಿಶೇಷ ಸೇವೆ ನಡೆಯಲು ಅವಕಾಶ ದೊರೆತದ್ದು ರಾಯರ ಅನುಗ್ರಹದ ವಿಶೇಷ ಸಂದರ್ಭವೆಂದು ಭಕ್ತಿಭಾವದಿಂದ ಸ್ವೀಕರಿಸುತ್ತೇವೆ. ಮಂತ್ರಾಲಯ ಮಠದ ಪ್ರಾಂಗಣದಲ್ಲಿ ಬೊಕ್ಕಸ ಭಜನಾ ತಂಡದ ಸದಸ್ಯರಿಂದ ಸುಶ್ರಾವ್ಯ ಸ್ಯಾಕ್ಸೋಫೋನ್ ವಾದನ ಸೇವೆ ನಡೆಯುತ್ತಿದ್ದ ಸಂದರ್ಭದಲ್ಲಿ, ಶ್ರೀ ಶ್ರೀ ಶ್ರೀ ಸುಬುಧೇಂದ್ರ ತೀರ್ಥರು ಚಿತ್ತೈಸಿ, ಭಜನಾ ಗುರುಗಳಿಗೆ ಭಜನಾ ಸೇವೆಯನ್ನು ನಡೆಸಿಕೊಡುವಂತೆ ಸೂಚಿಸಿದರು. ಶ್ರೀಗಳ ಸಮ್ಮುಖದಲ್ಲಿ 500ಕ್ಕೂ ಹೆಚ್ಚು ಗುರು-ಶಿಷ್ಯರು ಒಂದಾಗಿ ಸಂಕೀರ್ತನೆ ಆರಂಭಿಸಿದ ಕ್ಷಣ—ಅದು ಕೇವಲ ಭಜನೆಯಾಗಿರಲಿಲ್ಲ; ರಾಯರ ಸನ್ನಿಧಿಯಲ್ಲಿ ಭಕ್ತಿಯ ನಾದವಾಗಿ ಹರಿದುಬಂದ ಒಂದು ಸಾಮೂಹಿಕ ಸಮರ್ಪಣೆಯ ಕ್ಷಣವಾಗಿತ್ತು. “ವಾರಿಜಾಲಯಪತೇ… ವಾರಿಜನಾಭನೇ…” 🙏 ಭಗವಂತನ ಮಹಿಮೆಯನ್ನು ಸ್ಮರಿಸುತ್ತಾ, ಆ ಪರಮಾತ್ಮನ ಪಾದಕಮಲಗಳಿಗೆ ಮನಸ್ಸನ್ನು ಅರ್ಪಿಸುವ ಭಾವವನ್ನು ಹೊತ್ತಿರುವ ಈ ಕೀರ್ತನೆ, ಮಂತ್ರಾಲಯದ ರಾಯರ ಸನ್ನಿಧಿಯಲ್ಲಿ ಮೊಳಗಿದಾಗ ಅದರ ಭಕ್ತಿರಸ ಇನ್ನಷ್ಟು ಗಾಢವಾಗಿ ಅನುಭವವಾಗುತ್ತದೆ. ಭಗವಂತನನ್ನು ಸ್ಮರಿಸುವ ನಾಲಿಗೆ, ಆತನ ಪಾದಾರವಿಂದಗಳಲ್ಲಿ ನೆಲೆಸುವ ಮನಸ್ಸು—ಇದೇ ಭಕ್ತಿಯ ಸೌಂದರ್ಯ. ಅದರ ಬೆನ್ನಲ್ಲೇ ಮೊಳಗಿದ ಮತ್ತೊಂದು ಹೃದಯಸ್ಪರ್ಶಿ ಕೀರ್ತನೆ— “ಜೀಯಾ… ನೀನಲ್ಲದೆ ಇನ್ಯಾರು ಕಾಯುವರು…” 🙏 ಇಲ್ಲಿ ಭಕ್ತನ ಮನದಾಳದ ಮೊರೆ ಕೇಳಿಸುತ್ತದೆ. “ನಿನ್ನ ಹೊರತು ನನ್ನನ್ನು ಕಾಪಾಡುವವರು ಮತ್ತಾರು?” ಎಂಬ ಸಂಪೂರ್ಣ ಶರಣಾಗತಿಯ ಭಾವ. ತನ್ನ ಬದುಕಿನ ಭಾರವನ್ನು ಭಗವಂತನ ಪಾದಗಳಲ್ಲಿ ಇಟ್ಟು, ಆತನ ಕೃಪೆಯನ್ನೇ ಆಶ್ರಯಿಸುವ ಭಕ್ತನ ಹೃದಯದ ಮಾತಿನಂತೆ ಈ ಕೀರ್ತನೆ ಮೂಡಿಬರುತ್ತದೆ. ಮಂತ್ರಾಲಯದ ರಾಯರ ಸನ್ನಿಧಿಯಲ್ಲಿ, ನೂರಾರು ಕಂಠಗಳು ಒಂದಾಗಿ ಈ ಭಾವವನ್ನು ಹಾಡಿದಾಗ—ಭಕ್ತಿಯ ನಾದವೇ ಒಂದು ಪ್ರಾರ್ಥನೆಯಾಗಿ ಪರಿವರ್ತನೆಯಾದ ಅನುಭವ. ಈ ಎರಡು ಕೀರ್ತನೆಗಳಲ್ಲಿರುವ ಭಗವಂತನ ಸ್ಮರಣೆ, ಶರಣಾಗತಿ ಮತ್ತು ಕೃಪೆಯ ನಿರೀಕ್ಷೆಯ ಭಾವವನ್ನು 500ಕ್ಕೂ ಹೆಚ್ಚು ಗುರು-ಶಿಷ್ಯರ ಸಾಮೂಹಿಕ ಗಾಯನದಲ್ಲಿ ಆಲಿಸುವುದು ನಿಜಕ್ಕೂ ವಿಶೇಷ ಅನುಭವ. ಸುಮಾರು 45 ನಿಮಿಷಕ್ಕೂ ಹೆಚ್ಚು ಕಾಲ ರಾಯರ ಸನ್ನಿಧಿಯಲ್ಲಿ ಕುಳಿತು ಸಂಕೀರ್ತನಾ ಸೇವೆ ಸಲ್ಲಿಸುವ ಅವಕಾಶ ದೊರೆತದ್ದು ರಾಯರೇ ಕರುಣಿಸಿದ ಸೌಭಾಗ್ಯವೆಂದು ಭಕ್ತಿಭಾವದಿಂದ ಸ್ವೀಕರಿಸುತ್ತೇವೆ. ಈ ಸೇವೆಗೆ ವಿಶೇಷವಾದ ಮುತುವರ್ಜಿಯನ್ನು ವಹಿಸಿದ ಶ್ರೀ ಮಠದ ದಾಸ ಸಾಹಿತ್ಯದ ವಿಶೇಷ ಜ್ಞಾನಸoಪನ್ನರಾದ ಗೌರವಾನ್ವಿತ ಶ್ರೀ ವಾದಿರಾಜಾಚಾರ್ಯರ ಸಹಕಾರವನ್ನೂ ಅನುದಿನವೂ ಕೃತಜ್ಞತೆಯಿಂದ ನೆನಪಿಸಿಕೊಳ್ಳುತ್ತೇವೆ. ಮಂತ್ರಾಲಯವು ಶ್ರೀ ರಾಘವೇಂದ್ರ ಸ್ವಾಮಿಗಳ ಬೃಂದಾವನದಿಂದ ಪಾವನಗೊಂಡಿರುವ ಪುಣ್ಯಕ್ಷೇತ್ರ. ತುಂಗಭದ್ರಾ ನದಿಯ ತೀರದಲ್ಲಿರುವ ಈ ಕ್ಷೇತ್ರಕ್ಕೆ ದೇಶದ ವಿವಿಧ ಭಾಗಗಳಿಂದ ಪ್ರತಿದಿನ ಅಪಾರ ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿ ದರ್ಶನ, ಸೇವೆ ಮತ್ತು ಪ್ರಾರ್ಥನೆ ಸಲ್ಲಿಸುತ್ತಾರೆ. ಅಂತಹ ಪವಿತ್ರ ಸನ್ನಿಧಿಯಲ್ಲಿ 500ಕ್ಕೂ ಹೆಚ್ಚು ಮಂದಿ ಒಂದಾಗಿ ಭಜನಾ ಸೇವೆ ಸಲ್ಲಿಸುವ ಅವಕಾಶ ದೊರೆತದ್ದು ಶ್ರೀ ರಾಘವೇಂದ್ರ ರಾಯರ ಕೃಪೆಯೆಂದೇ ಭಕ್ತಿಭಾವದಿಂದ ಸ್ವೀಕರಿಸುತ್ತೇವೆ. ಸೇವೆಯ ಬಳಿಕ ಮಂತ್ರಾಲಯ ಶ್ರೀಗಳು ಗುರು-ಶಿಷ್ಯರ ತಂಡದ ಪ್ರತಿಯೊಬ್ಬರಿಗೂ ಫಲ ಹಾಗೂ ಮಂತ್ರಾಕ್ಷತೆಗಳನ್ನು ನೀಡಿ ಆಶೀರ್ವದಿಸಿದರು. ಶ್ರೀಗಳ ಸಾನ್ನಿಧ್ಯ… ರಾಯರ ಪವಿತ್ರ ಬೃಂದಾವನ… ನೂರಾರು ಕಂಠಗಳಲ್ಲಿ ಮೊಳಗಿದ ಸಂಕೀರ್ತನೆಯ ನಾದ… “ನೀನಲ್ಲದೆ ಇನ್ಯಾರು ಕಾಯುವರು…” ಎಂಬ ಶರಣಾಗತಿಯ ಆರ್ತಭಾವ… ಇವೆಲ್ಲವನ್ನು ಒಂದೇ ಸಂದರ್ಭದಲ್ಲಿ ಅನುಭವಿಸುವ ಸೌಭಾಗ್ಯ ಅಪರೂಪ. ಈ ಭಕ್ತಿಭಾವದ ಕ್ಷಣಗಳನ್ನು ಬರಹದಲ್ಲಿ ಓದುವುದಕ್ಕಿಂತ, ವಿಡಿಯೋದಲ್ಲಿ ಕಣ್ಣಾರೆ ನೋಡಿ, ಕಿವಿಯಾರೆ ಕೇಳಿ, ಮನದಾಳದಿಂದ ಅನುಭವಿಸುವುದೇ ವಿಶೇಷ. 🙏 ಮಂತ್ರಾಲಯದಲ್ಲಿ ನಡೆದ ಈ ಅಪೂರ್ವ ಸಂಕೀರ್ತನಾ ಸೇವೆಯ ಜೊತೆಗೆ ಸುಪ್ರಭಾತ ಸೇವೆ, ಗುರುವಂದನೆ ಹಾಗೂ ಶ್ರೀ ರಾಘವೇಂದ್ರ ರಾಯರ ವಿಶೇಷ ಪಂಚ ರಥೋತ್ಸವದ ಭಕ್ತಿಭಾವದ ದೃಶ್ಯಗಳನ್ನೂ ಶೀಘ್ರದಲ್ಲೇ M K B Creations ನಲ್ಲಿ ನಿಮ್ಮ ಮುಂದೆ ತರುತ್ತಿದ್ದೇವೆ. 🙏 ಶ್ರೀ ರಾಘವೇಂದ್ರಾಯ ನಮಃ 🙏