བདུད་བྷེ་ - བཀྲ་ཤིས་སྒྲོལ་མ། - སྐལ་བཟང་ལྷ་མོ། Tibetan song Kalsang Lhamo by Dubhe and Tashi Dolma

ཚིག ལྷ་རྒྱལ་ཚེ་རིང་། དབྱངས། པདྨ། ལེན་མཁན། བདུད་བྷེ་དང་བཀྲ་ཤིས་སྒྲོལ་མ། དར་དཀར་བོ་ལྟ་བུའི་སྨུག་པ་དེ། ། རི་མཐོན་པོའི་ཟོམ་ནས་མཁའ་ལ་ཆས། ། གཡུ་སྔོན་མོ་ལྟ་བུའི་ནམ་མཁའ་ན། ། སྤྲིན་དཀར་པོ་དུམ་བུ་དུམ་བུ་སྐྱོད། ། ཨེ་མ་་་སྐལ་བཟང་ལྷ་མོ་ལགསས། ། མཐོངས་འདི་ན་སྐྱོད་པའི་སྤྲིན་དཀར་འདི། ། ཁྱོད་ཀྱི་གཡང་དཀར་ལུག་ཁྱུ་རེད་ལོ། ། དབྱར་མེ་ཏོག་བཞད་པའི་སྤང་ཐང་དུ། ། རྩྭ་སྔོན་མོའི་མཛེས་སྡུག་ཐགས་སུ་བསྐྲུན། ། རླུང་གསེར་བུ་དལ་གྱིས་རྒྱུ་བ་ན། ། སྤང་མེ་ཏོག་གསེར་ཆེན་འཛུམ་ཞིང་དགོད། ། ཨེ་མ་་་སྐལ་བཟང་ལྷ་མོ་ལགས། སྤང་འདི་ན་བཞད་པའི་སེར་ཆེན་འདི། ། ཁྱོད་ཀྱི་སླད་མེད་འཛུམ་མདངས་རེད་ལོ། ། གངས་དཀར་བོའི་ཟུར་ནས་ཡོང་བ་ཡི། ། ཆུ་སྔོན་མོ་འདི་ན་དྭངས་ཞིང་འཚེར། ། རྫ་སྨུག་པོའི་ཁྲོད་ནས་བཞུར་བ་ན། ། ཡག་མུ་ཏིག་གཏོར་བཞིན་དགའ་ལྷང་ལྷང་། ། ཨེ་མ་་་་སྐལ་བཟང་ལྷ་མོ་ལགས། ། ཆབ་སྔོན་མོའི་ལྷུང་ལྷུང་བཞུར་སྒྲ་འདི། ། ཁྱོད་ཀྱི་སྙན་འཇེབས་དགོད་སྒྲ་རེད་ལོ། །