Rizqi Rajabiy haqida hujjatli film

Rizqi Rajabiy (1887 — Toshkent — 1977.20.7) — sozanda (tanbur), oʻzbek musiqa ijrochilik sanʼatining yirik namoyandasi. Oʻzbekistonda xizmat koʻrsatgan artist (1940). Yunus Rajabiyning akasi. Toshkent musiqa texnikumini tugatgan (1923). Samarqand musiqa bilim yurtida oʻqituvchi va viloyat musiqali teatrida sozanda (1924-27). Oʻzbekiston radioqoʻmitasi huzuridagi Xalq musiqa cholgʻulari ansamblida sozanda, konsertmeyster (1927—42). Toshkent musiqa texnikumida (1930—39), Toshkent konservatoriyasida (1972—77) oʻqituvchi. Ijro uslubi nohun zarblarini hamda musiqa bezak (nolish, sayqal)larini kuy xarakteri va mazmuniga moslab ishlatishi bilan ajralib turadi. Repertuaridan maqom yoʻllari (Tasnifi va Samoyi Dugoh, Gulyori Shahnoz, Garduni va Ufari Segoh va boshqalar) hamda mumtoz cholgʻu kuylari (Miskin, Nasrulloyi, Tanavor, Munojot, Abdurahmonbegi, Girya, Suvora kabi) oʻrin olgan. Sanʼatshunoslik ilmiy tadqiqot institutida 200 dan ortiq, Oʻzbekiston radiosi va Toshkent grammyozuvlar studiyalarida Rizqi Rajabiy ijrosida 100 ga yaqin kuy yozib olingan. U bir necha ashula ("Soralar", "Yashnasin", "Yorugʻlik", "Ovoraman", "Tantana", "Oftobim") va kuy ("Chaqir", "Olgʻa", "Uxlasin")lar muallifi. Akbar Haydarov, Mahmud Yunusov, Orif Qosimov va boshqalar uning shogirdlari hisoblanadi.