ტრამვაის ხაზის პროექტირება-მშენებლობაზე ხელშეკრულება გაფორმდა - რას მოუტანს თბილისს პროექტი?

დედაქალაქში ტრამვაის პროექტის განხორციელება ახალ ეტაპზე გადადის. თბილისის სატრანსპორტო კომპანიამ ტრამვაის ხაზის პროექტირება - მშენებლობის ტენდერში გამარჯვებულ თურქულ კომპანია “ EYE”-სთან ხელშეკრულება ოფიციალურად გააფორმა. ტრამვაის ხაზმა დიდი დიღომი მეტროსადგურ „დიდუბის“ მიმდებარე ტერიტორიას უნდა დააკავშიროს. ხაზის საორიენტაციო სიგრძედ 7.5 კმ განისაზღვრა, სადაც განთავსებული იქნება 11 გაჩერება. უკვე ცნობილია, რომ ტრამვაის ხაზის მშენებლობის ფარგლებში შესაძლოა, საჭირო გახდეს განსახლებაც, რის გამოც პროექტის სრულად დასრულებას სავარაუდოდ, 4 წლამდე პერიოდი დასჭირდება. სპეციალისტების და ურბანისტების ნაწილი აცხადებს, რომ დედაქალაქში საცობების განტვირთვისთვის ტრამვაის ალტერნატივა არ აქვს. თუმცა მათი თქმით, პროექტის სირთულიდან გამომდინარე, კითხვა ჩნდება, რამდენად მოესწრება მისი დასრულება დაგეგმილ ვადებში.