Հետաքրքիր մարդ արի կավով բզբզալուTerracotta studio, Naira Muradyan, Nana Manucharyan,

#Հետաքրքիր_մարդ_արի_կավով_բզբզալու՝ սա Terracotta Studio -ի նոր նախագիծն է, որի շրջանակներում կտեսնեք ամենատարբեր մարդկանց՝ մեր ջերմ արվեստանոցում կավով աշխատելիս։ 🌿 Terracotta studio-ի առաջին հյուրը նկարիչ, մուլտիպլիկատոր Նաիրա Մուրադյանն է։ Քանի որ մեր հյուրերն անչափ հետաքրքիր են հենց մեզ՝ բաց չենք թողնում առիթը լավ զրույցի։ Ներկայացնում ենք զրույցից մի պատառիկ, իսկ հանդիպման մյուս մանրամասները կարող եք դիտել յութուբյան մեր ալիքով։ 🎥 Այսպիսով, մեզ շատ հետաքրքիր է՝ ինչի՞ց է ոգեշնչվում Նաիրան իր ֆիլմերը ստեղծելիս (բացի երազների խորհրդավորությունից՝ ինչպես ինքն է ասում), հատկապես հայաստանյան իրականության մեջ։ Հարցին ի պատասխան Նաիրան ասում է․ «Հայաստանյան իրականությունն, իր բոլոր սարսափներով վերցրած, այս արևն ունի (ցույց է տալիս ստուդիա թափանցած շողերը), որն ուրիշ ոչ մի ուրիշ երկրում չկա։ Նախկինում շատ էինք գնում Պետերբուրգ․ այդ ժամանակ զգում էի՝ փոսում ենք, ներքևում ենք, չնայած մեծ, սիրուն, լայն քաղաք է․․․ Հայաստանի դիրքը բարձր է, և լույսի այդ զգացողությունը միայն այստեղ է»։ ✨ Նաիրան իր անիմացիաներով ստեղծում է նոր աշխարհներ, որոնք «իրենից առանձին չեն, իրենն են»։ «Կամ իրենք են քո մեջ, կամ դու ես իրենց մեջ»,- ընդգծում է նա։ Իսկ այն հարցին, թե ի՞նչ գերբնական ունակությամբ կուզեր օժտված լինել նոր աշխարհներ ստեղծող մուլտիպլիկատորը, Նաիրան պատասխանում է․ «Ժամանակը երկարացնելու կարողությամբ, բայց ոչ թե ապրելուս ժամանակն, այլ օրվա՝ գիշերվա ժամանակը երկարացնելու ունակությամբ (գիշերն եմ աշխատում)»։ 🌄 Իր ստեղծած կերպարների մասին խոսելի Նաիրան ընդգծում է․ «Որևէ ֆավորիտ կերպար չունեմ, անելուց հետո իրենց մոռանում ես․․․ չէ, ոչ թե մոռանում, այլ բաց ես թողնում։ Կերպարներին ստեղծելու ընթացքում ես շատ սիրում, բոլորին՝ հավասար, իսկ ֆիլմը վերջացնելուց մի քիչ առաջ բաց ես թողնում։ Որովհետև մի ֆիլմը չավարտած, մտածում ես մյուսի մասին»։ Մեզ հետաքրքրում է նաև՝ ինչպես է ընթանում բաց թողնելու պրոցեսը։ Հեղինակին հե՞շտ է տրվում բաց թողնելու արվեստը։ «Վերջին ֆիլմս ապակու վրա էր նկարվում, յուղաներկով՝ ապակու վրա։ Մի պատկերը ջնջվում էր՝ հաջորդի համար։ Դու դրան սովորում ես։ Լավ նկարեցիր, բայց պիտի ջնջես, որ երկրորդ կադրը նկարես։ Արդեն համակերպված ես»,- նշում է Նաիրան։ Վերջում խոսում ենք երազանքներից, Նաիրայի խոսքով՝ իր երազանքները բացառապես մասնագիտական են։ Հիմա երազում է, որ չսխալվի իր նոր ֆիլմի լեզվի ընտրության հարցում։ «Ամեն ֆիլմ ունի իր լեզուն․ հիմա յուղաներկից հրաժարվել եմ, ֆոտոշոփով եմ նկարում, դա արդեն լեզու է, նախորդից տարբերվող: Հիմա հետաքրքիր է, վառվում եմ, անում-անում եմ և չեմ ուզում ինչ-որ պահից զգալ, որ սխալվել եմ»։ Սիրելի հետևորդներ, մնացեք մեզ հետ և սպասեք մեր մյուս անչափ հետաքրքիր հյուրերին: Միշտ սիրով` Terracotta թիմ ❤