Жамбыл облысын шулатқан қанды оқиға

Жамбыл облысында "жергілікті мафия жалғыз ұлымды суық қарумен жайратып салды" деген әке Ішкі істер министрінен көмек сұрайды. Айтуынша, 25 жастағы баласын асқан айуандықпен атып кеткен. Қара жамылған әулет бұл іске қылмыс әлемі серкесінің қатысы бар деп отыр. Сондықтан мемлекеттік күзет тағайындауды сұрайды. Әріптесім Нұрадин Рақай Құлан ауылындағы қанды оқиғаның жай-жапсарын біліп келді. Боталап қалған анасының жасы сарқылғанмен, зарынан еріксіз жүрегі езіледі. Қанды оқиғаны марқұмның туыстары жылап еске алды. ЗАРИНА ДҮКЕНБАЕВА, марқұмның әпкесі: Сағат екі жарымның шамасында папам намаз оқып отырған кезімде тарс-тарс деген дауыстар шықты. Бес рет атылды дейді. 4-5 рет атылды бірінен кейін бірі дейді. Артынша бір сағат көлемінде үйге милициялар келген. Балаңыз ауыр жағдайда ауруханаға түсті деп. Ол бала осы жерде ақ жүріп кеткен ғой. Мәйітті денең түршікпей көру мүмкін емес. Ауыздан атылған оқ құлақ түбінен тесіп шыққан. Арқасынан тигені жүрек тұсын жұлып шыққан. Белі мен балтырында да оқ ізі қалған. Бақилық болған Ахмет Дүкенбайдың жақындары қанды қылмысқа ауыл жастарын ашса алақанында, жұмса жұдырығында ұстаған қылмыстық топтың тікелей қатысы бар деп отыр. Айтқанына көнбеген, айдағына жүрмеген соң атып кетті деп топшылайды. ЗАРИНА ДҮКЕНБАЕВА, марқұмның әпкесі: Бұл баяғыдан келе жатқан Така Мака деп қояды. Осы ауылды ұстайтын, қарайтын сол екен. Сол отыр дегенге отырады, тұр дегенге тұрады жастар сондай болу керек екен. Ары-бері жұмсағысы келген. Қол бала қылғысы келген. Бірақ бұл көнбеген. Ажал құшқан 25 жастағы азаматтың артында екі баласы мен жұбайы қалды. Марқұм соңғы аптада жарына барынша сақ болуды айтыпты. Ұл-қызын оңаша ойнатпа, бақылаусыз қалдырма, көзден таса қылма деп ескертумен болыпты. Бірақ оның мәнін түсінбедім дейді жұбайы. АЛТЫНАЙ БОРАНБАЙ, марқұмның жұбайы : Солар ғой. Солармен конфликт болып жүр деп айтып жүрген болатын маған. Балаларды абайлашы. Балаларға еге болшы деп достары айтып жүрді. Алысқа жібермеші, қарап жүрші кесірі тимесін өзіңде абай жүрші деген әңгімелер болды. Ал жетпіске келіп жалғыз ұлынан айырылған әке отбасына арнайы күзет қоюды өтінеді. СЕРІК ДҮКЕНБАЙҰЛЫ, марқұмның әкесі: Мамыражай заманда қырғын сүргін адам өлтіру болып отыр. Бұларды тоқтатпасақ жеке-жеке емес семьяны қырып кетуі мүмкін. Бүкіл семьяны. Содан қорқып біз қарулы күзет қоюды талап етеміз. Белгілі болғандай күдікті жарты тәулікте ұсталған. Қазір полиция бұл іске қылмыстық топтың қатысы бар-жоғын анықтап жатыр. ГҮЛСАРА МҰХТАРҚҰЛОВА, Жамбыл облысы полиция департаментінің баспасөз хатшысы: Аталған дерек бойынша Қазақстан Республикасы Қылмыстық кодексінің «Кісі өлтіру» бабымен сотқа дейінгі тергеу амалдары басталды. Полиция қызметкерлерімен күдікті анықталып, уақытша ұстау изоляторына қамаққа алынды. Қазіргі уақытта қылмысты жан-жақты, толық тергеп-тексеруге бағытталған қажетті тергеу әрекеттері жүргізілуде. Осылайша бір отбасын ойрандаған қанды қылмыс естігенді үрейлендіріп қойды. Сондықтан қозғалған іс бұрмаланбай әділ өтсінші деген жалғыз ұлынан айырылған әкенің жалғыз тілегі бар. #Информбюро #Жамбылоблысы #БастыЖаңалықтар #Новости #31канал