Şəhidin səsi - Nicat Nəbiyevin əziz xatirəsinə həsr olunur

“Tehsil365” İnformasiya Agentliyinin həyata keçirdiyi “Şəhidin səsi” layihəsinin növbəti buraxılışı Vətən müharibəsi şəhidi Nicat Ramil oğlu Nəbiyevin əziz xatirəsinə həsr olunacaq. Proqram bu gün, saat 18:00-da “Tehsil365” İnformasiya Agentliyinin rəsmi YouTube səhifəsində yayımlanacaq. Bu buraxılışın aparıcısı “Tehsil365” İnformasiya Agentliyinin təşkil etdiyi V “Könüllü müxbir” layihəsində könüllü müxbir kimi fəaliyyət göstərmiş və diplomla təltif olunmuş Gülşən Heydərova olacaq. Nicat Ramil oğlu Nəbiyev 16 dekabr 2000-ci ildə Sumqayıt şəhərində anadan olub. Orta təhsilini şəhərin 39 nömrəli tam orta məktəbində alıb, daha sonra peşə təhsili üzrə “Avtomobil istismarı” ixtisasına yiyələnib. 2019-cu ilin iyun ayında həqiqi hərbi xidmətə yollanan Nicat Goranboydan Ağdama qədər xidmət yolu keçib. 2020-ci il sentyabrın 27-də Vətən müharibəsi başlayandan etibarən ön cəbhədə xidmət edib. Həmin il oktyabrın 1-də düşmənin artilleriya atəşi nəticəsində aldığı qəlpə yarasından şəhidlik zirvəsinə ucalıb. Nicatın anası Əfsanə Əbülfətova oğlunun hələ 11 yaşından işlədiyini, ailəsinə kömək etməyə çalışdığını və onunla sonuncu dəfə 2020-ci il oktyabrın 1-də telefonla danışdığını bildirib. Ana həmin danışıq zamanı Nicatın sakit olduğunu, vəziyyətin yaxşı olduğunu söylədiyini xatırlayır. Şəhid anasının sözlərinə görə, Nicat ailəsinə bağlılığı, mərhəməti və insanlara göstərdiyi qayğı ilə seçilib. Ana və oğul arasındakı münasibət yalnız ailə bağları ilə məhdudlaşmayıb, onlar bir-birinin ən yaxın sirdaşı və dostu olublar. Lakin Nicat hərbi xidmət və döyüşlər zamanı qarşılaşdığı çətinlikləri anası ilə bölüşməyib, onu narahat etməməyə çalışıb. Azərbaycan Respublikasının Prezidenti İlham Əliyevin müvafiq sərəncamlarına əsasən, Nicat Nəbiyev “Vətən müharibəsi iştirakçısı”, “Ağdamın azad olunmasına görə” və “Vətən uğrunda” medalları ilə təltif edilib. O, həmçinin Azərbaycan Respublikasının ərazi bütövlüyünün bərpası uğrunda döyüş əməliyyatlarında göstərdiyi igidlik və mərdliyə, hərbi vəzifəsini şərəflə yerinə yetirdiyinə görə 3-cü dərəcəli “Vətənə xidmətə görə” ordeni ilə təltif olunub. “Şəhidin səsi” proqramının bu buraxılışında Nicat Nəbiyevin həyatına, döyüş yoluna və əziz xatirəsinə bir daha nəzər salınacaq, onun Vətən uğrunda göstərdiyi qəhrəmanlıq tamaşaçılara təqdim ediləcək. Qeyd edək ki, “Şəhidin səsi” “Tehsil365” İnformasiya Agentliyinin şəhidlərimizin həyat və döyüş yolunu işıqlandırmaq, onların əziz xatirəsini yaşatmaq məqsədilə həyata keçirdiyi layihədir. #ŞəhidinSəsi #NicatNəbiyev #ŞəhidNicatNəbiyev #Tehsil365 #Tehsil365İnformasiyaAgentliyi #VətənMüharibəsi #ŞəhidlərUnudulmur #ŞəhidlərÖlməz #VətənUğrunda #Qəhrəmanlarımız #NicatNəbiyevinXatirəsi #KönüllüMüxbir #AzərbaycanŞəhidləri #AğdamınAzadOlunması #VətənəXidmətəGörə