«Тәуелсіздікке тағзым» атты кітап көрмесі. Ақбастау ауылының № 6 кітапхана-филиалы.

25 қазан – Республика күніне орай «Тәуелсіздікке тағзым» атты кітап көрмесі ұйымдастырылды. Көрменің мақсаты – оқырмандарға Қазақстан Республикасының қалыптасу тарихын, мемлекеттік рәміздердің маңызын және егемен еліміздің жетістіктерін насихаттау, өскелең ұрпақтың бойында отансүйгіштік сезімін қалыптастыру. Кітап көрмесі төрт бөлімнен тұрды. «Мемлекеттік рәміздер – елдігіміздің белгісі» бөлімінде Қазақстан Республикасының Мемлекеттік Туы, Елтаңбасы мен Әнұраны туралы материалдар, олардың авторлары жөніндегі мәліметтер ұсынылды. «Тәуелсіздік шежіресі – тарихымыз» бөлімінде Алаш қайраткерлері Әлихан Бөкейхан мен Ахмет Байтұрсынұлының шығармалары және Желтоқсан оқиғасына арналған кітаптар қойылды. «Тәуелсіз Қазақстан – егемен ел» бөлімінде еліміздің даму жолы, Астана қаласының тарихы, Қарағанды облысы мен Абай ауданының өткені мен бүгіні туралы өлкетану әдебиеттері таныстырылды. Ал «Рухани қазына – әдебиетіміз» бөлімінен Абай Құнанбайұлының, Мұхтар Әуезовтің шығармалары және балаларға арналған «Менің Отаным – Қазақстан» энциклопедиясы орын алды. Көрме аясында оқырмандарға Республика күнінің тарихи маңызы түсіндіріліп, ұсынылған әдебиеттерге тақырыптық шолу жасалды. Кітап көрмесін ауыл тұрғындары мен мектеп оқушылары тамашалады. Республика күні – еліміздің тәуелсіздікке бастаған тарихи қадамын айқындайтын маңызды мереке. Еліміздің егемендігі баянды, тәуелсіздігіміз тұғырлы болсын!