เพลง วัดมรรคสำราญนิวาสสถานพุทธิธรรม

เพลง วัดมรรคสำราญนิวาสสถานพุทธิธรรม ผู้จัดสร้าง : กุฏิบูรพาจารย์ คณะ ๑ และศิษยานุศิษย์ ๑. พระครูสังฆรักษ์บัวคำ มหาวีโร ๒. พระปลัดกิตติศักดิ์ ญาณเมธี ๓. พระสิทธิพล โสภณจิตฺโต ๔. พระวันชัย ฐานวีโร ๕. พระบุญเสริม จิรวฑฺฒนเมธี ขับร้อง : สุรพล ทองด้วง ประพันธ์ : บุญเสริม อาจดวงดี ดนตรี : ภูมิศักดิ์ คีตะ อีสาน เนื้อร้อง (เกริ่น) ศุภวาระล้ำอุตตมยามดี เป็นดิถีมงคลโสตถิผลนวยน้อม มาลาหอมฮวยเฮ้าสุคันธาเอ้แต่ง ประทีปแสงฮุ่งใต้เตรียมไว้พร่ำมวล ทุกสิ่งล้วนควรค่างามสม ยอถวายบรมเอกองค์พุทโธไท้ เป็นที่ใสเฮืองเลื่อมเทียมจันทร์สิบห้าค่ำ ธัมมัสสะมาสมื้อเถลิงขึ้นคู่สู่ศีล พุทธศกบ่สิ้นเลยล่วงบ่สูญหาย ยังเหลือหลายคนถือเที่ยงธรรมมโนน้อมศรัทธาหลอมรวมเข้าสามัคคีวิถีท่อง เทียวย่องยื่อยามเยี่ยมวัดวา ผักตูไขเปิดอ้าสมมิ่งภูมิสถาน ชื่อวัดมรรคสำราญใส่ขนานนามไว้ หนังสือมีใบแจ้งประจักษ์ตามนามเก่า ท่าสำราญแต่เค้าเวิงน้ำแหล่งอุดม สมส่าย่องผู้เทียวท่องมาเห็น ได้เผิ่งเย็นเซาพักฮ่มหัวหายฮ้อน จั่งแม่นออนซอนโอ้ใจภิญโญซ้อยซื่น บัดว่าหลิงหล่ำเยี่ยมใสเลี่ยมฮุ่งเจริญ สมเพิ่นเอิ้นเติ่นป่าวศรัทธา มาเฮามาชมวัด มรรคสำราญพี้ (เดินกลอน) เอาเด้อ เบิ่งอาวาสกว้างเฮืองฮุ่งจรุงศรี บารมีธรรมแห่งสมภารเจ้า เป็นกกเหง้าประธานสงฆ์ทรงค่า สืบกันมาแต่พุ้นคูณค้ำหล่ำแงง ฮู้แจบแจ้งแถลงเรื่องเขียนสาสน์ มรรคสำราญวัดชื่อเดิมคงไว้ มีใบตั้งเขียนมาบอกต่อ พอศอสองพันสี่ร้อย ปางพุ้นหุ่นหลัง มาอยู่ยั่งฮิมท่าสำราญ จั่งขนานนามวัดแต่งตามนามเอิ้น ดำเนินสร้างทางสงฆ์บอกเล่า ทั้งผู้หนุ่มผู้เฒ่าเอาใจสู้ส่อยแฮง ท่วมและแล้งบ่ถิ่มปล่อยไลปะ สร้างวัดมาสัพเสร็จส่อยกันจนแล้ว งามปานแก้วแวววาวขาวผ่อง ความศรัทธาพี่น้องโฮมตุ้มต่อมกัน ฮอดบ่อนบั้นเวลาล่วงมาเถิง คนกะเลิงเลิงสุขสู่ภายหายฮ้อน ออนซอนโอ้เสียงโยโสเซ็งส่า หลวงปู่จันทาสวดขึ้นมโนตั้งต่อธรรม ผู้เลิศล้ำยอดหยิ่งครองสงฆ์ ปฐมองค์สมภารหลวงปู่จันทะสารนั้น เมิดจากฮั่นถัดกันสืบต่อ หลวงปู่ชัยศักดิ์บ่ช้าสมภารเจ้าผู้สอง คนยกย่องคัดเคร่งครองสงฆ์ จั่งดำรงมาถึงรูปที่สามนามเค้า รักษาเฝ้าพัฒนาหลายส่วน ประโยชน์สุขเลิศล้วนถองถ้วนถี่ธรรม ได้ส่อยค้ำหลิงหล่ำแลดู ทุกมุมแกของวัดพัฒนามาเรื่อย มีศัพท์สร้อยทินนามแผ้วผ่าน พระครูสุเมธธรรสาร เป็นสมภารยอดยิ่งขวัญมิ่งวัดวา สมค่าแล้วแก้วมิ่งเมืองขอน ชาวบ้านดอนหญ้านาง ต่างโมทนาน้อม… (เดินขอนแก่น) มาพร้อมเพียงกันทั่วหน้า ด้วยความศรัทธาเลื่อมใสใบบุญ น้อมนำอุปถัมภ์เกื้อหนุน ช่วยกันค้ำจุนพุทธศาสน์รุ่งเรือง แนมไปเบื้องบ่อนใสเฮืองเฮืองฮุ่ง ใจผดุงต่อตั้งยังแก้วรัตนา เบยเบิกฟ้าสาดส่องทะรังสี ศาสนีคำสอนบ่เก่ากาลนานเนิน ชวนเชิญอย่าลืมไปๆ มีบุญปางใด๋ให้ร่วมใจกันมา ตุ้มโฮมฮักแพงอย่าถิ่ม อย่าได้ถอดหลิ่มพระพุทธศาสนา ให้หนักแน่นอย่าคลอนแคลนศรัทธา ให้มาไหว้หลวงพ่อพระพุทธเมตตา ให้สมสุขหวังเหมือนดังที่ตั้งใจมา บุญสิส่อยรักษา เทวดาสิแนมเบิ่ง (วาทสรภัญญ์กาเต้นกอน) เจ้าผู้เถิงพระรัตนังให้กั้งกระหม่อม เจ้าผู้หอมสุคันชาติในครองศีล เจ้าผู้สุดวิมุติโลกวิโมกข์มุนินทร์ เจ้าผู้โสตยลยินสัทธรรมมุนินพระศาสดา ให้บุญผลาในชาติสิมาผู้ข้าได้เพิ่ง ให้ใสเลิงเลิงซ้นฮ่มพระศาสน์โพธิ์ศรี ได้ขุดน้ำบ่อก่อสร้างศาลาพระเจดีย์ สมปรารถนาได้เป็นคือว่านักบุญเศรษฐี ผู้ข้าเกิดชาตินี้ บุญหลายอีหลี ได้พ้อพระพุทธศาสนา ผู้ข้าจั่งได้ว่า ว่าสาธุเด้อ สาธุเด้อ ว่าสาธุเด้อ ให้โยๆหยิ่งๆ สุสรรพสิ่งมังคะลา งามคือดวงรัตนาหน่วยวิเศษใสแสง อุตตะมะพิลาสล้ำพุทธธรรมสงฆ์ให้ยอแงง สุรภาฝ่ายแจ้งให้งามเลื่อมฮุ่งตา สมเพิ่นสร้างแปลงมา สังฆะบูรพาจารย์ นามวัดมรรคสำราญ บ้านดอนหญ้านางออนซอนหลาย