İranda Pezeşkiana görünməmiş dəstək

ABŞ ilə son dərəcə gərgin münasibətlər və hərbi qarşıdurma şəraitində İran nümayəndə heyətinin BMT Baş Assambleyasının 81-ci sessiyasında iştirak etmək üçün Nyu-Yorka səfəri ölkədə diqqət mərkəzində olan əsas hadisəyə çevrilib. Nümayəndə heyətinə İran prezidenti Məsud Pezeşkian rəhbərlik edib, ondan bir gün əvvəl isə Xarici İşlər naziri Abbas Əraqçi Nyu-Yorka yollanıb və bir sıra görüşlər keçirib. Sentyabrın 23-də Pezeşkian Assambleyanın iclasında təqribən 20 dəqiqəlik çıxış edib. ABŞ prezidenti Donald Trampın İrana qarşı ağır ittihamlar və sərt təhdidlər ehtiva edən daha əvvəlki çıxışı fonunda Pezeşkianın nitqi İranda misli görünməmiş dəstək qazanıb. Ən diqqətçəkən məsələ odur ki, dünənə qədər Pezeşkianı və onun başçılıq etdiyi hökuməti daim tənqid edən, hətta İran prezidentinin vəzifəsindən kənarlaşdırılmasını tələb edən mühafizəkar siyasi dairələr də onun BMT Baş Assambleyasındakı çıxışını təqdir edərək alqışlayıblar. Xüsusən Pezeşkianın BMT tribunasından ABŞ və İsrail tərəfindən qətlə yetirilən keçmiş ali rəhbər Ayətullah Əli Xameneyinin və Minab məktəblilərinin şəkillərini nümayiş etdirməsi, Trampın iddiasının əksinə olaraq, İranın terroru dəstəkləyən dövlət deyil, terrorun qurbanı olan ölkə olduğunu bəyan etməsi, həmçinin İranın təzyiqlər qarşısında boyun əyməyəcəyini və təslim olmayacağını qətiyyətlə bildirməsi qeyd olunan müsbət reaksiyaların meydana çıxmasına səbəb olub. #İran #BMT #Pezeşkian #çıxış #ABŞ #Tramp