Пластикалық ота жасатқысы келген танымал блогер клиникада қайтыс болды

Алматыда пластикалық ота жасатқысы келген блогер Сәуле Базархан клиникада қайтыс болды. Туыстарының айтуынша, 53 жастағы әйел орталыққа жоспарлы липосакцияға барған. Бірақ операцияға кірген соң дәрігерлер болған жайтты бірден хабарламады дейді. Сөзге сенсек, жедел жәрдем де кеш шақырылған. Сол себепті де марқұмның жақындары "Smart Beauty" клиникасын айыптап, тиісті жаза талап етуде. Мән-жайды әріптесім Оразай Нұртайұлы анықтады. Дене пішінін түзеуге арналған хирургиялық отаға жатып көз жұмған Сәуле Базарханның жақындары өлімге "Smart Beauty" клиникасын ашық түрде айыптайды. Сөздерінше, дәрігерлер әйелді операцияға түстен кейін сағат 4-тер шамасында кіргізген. Сол кезде емшара көп болса 1 сағатта бітетінін айтқан дейді. Алайда блогер белгіленген уақытта шықпаған. Клиника қызметкерлері де үнсіз қалған. Отаға кірген адамның демі таусылғанын дәлізде күткен туысы жедел жәрдем келіп кеткеннен кейін ғана білген. БОЛАТХАН ЕРМАХАНОВ, Марқұм Сәуле Базарханның Ағасы: Скорый сол сағат 7-лерде келіп, қайтадан кетіп қалған. Міне, сол кезде білдік. Соған қарағанда скорый "Мұның бәрі бесполезно" деп айтқан сияқты. Скорый келгенше іштегі дәрігерлер өздері тірілтуге тырысқан. Оның ізі тұр. Мен моргтен сұрағанда врачтар солай деді. Оның айтуынша, жүрек тоқтаған бірден. Туыстарының айтуынша, марқұмның денсаулығына қатысты шағымы болмаған. Ота алдында 1 апта бойы анализ тапсырып, тиісті тексеруден өтті дейді. Операция залында не болғаны, қандай дәрі салғаны әзірге белгісіз. Жақындарының сөзінше, бір анығы клиника қызметкерлері жедел жәрдемге тым кеш хабарлаған. АЛЬДИЯ ҮСЕНБЕКОВА, марқұм Сәуле Базарханның келіні: Жедел жәрдемді сағат 8-ге таман шақырып отыр. Сенесіздер ме?! Әбден уақыт өтіп кеткенде шақырған. Оған дейін анамыз 5 сағат жатқан. Сонда жабық есіктің артында не болған?! Бәрін тексеруін талап етеміз! Бүгінде клиниканың өзі жабық. Бірақ күні кеше ашық тұрған дейді көршілес мекеменің қызметкерлері. Оқиғаға қатысты "Smart Beauty" мән-жайды әлі де жарияламады. "SMART BEAUTY" КЛИНИКАСЫНЫҢ РЕСМИ МӘЛІМДЕМЕСІНЕН ҮЗІНДІ: Дәрігерлік құпияны сақтау қажеттілігіне, пациент отбасының жағдайына құрметпен қарауға, сондай-ақ жүргізіліп жатқан шаралардың объективтілігі мүддесіне байланысты клиника ресми рәсімдер аяқталғанға дейін оқиғаның мән-жайы мен медициналық деректеріне қатысты жария түрде пікір білдіруді мүмкін емес деп санайды. Клиникада көз жұмған 53 жастағы Сәуле Базархан танымал блогер, әлеуметтік желіде 1 миллионнан астам оқырманы бар. Өзі стоматология ашқан кәсіпкер. Өнер адамдарымен жақын араласқан. ОРАЗАЙ НҰРТАЙҰЛЫ, тілші: Пластикалық хирургия клиникасындағы өлімге қатысты полиция қылмыстық іс қозғады. Мән-жайды Денсаулық сақтау министрлігі де назарға алған. Қайғылы жайттан соң ведомство тек Сәуле Базархан көз жұмған Smart Beauty клиникасына ғана емес, өзге де косметологиялық қызмет көрсететін орталықтарға мониторинг күшейетінін хабарлады. #Информбюро #31арна #СәулеБазархан #пластикалықота #31канал