أنا أبويا قالي الدنيا دي ٥ دقايق بالتمام 🤎 | كاملة

‪@fareskatrya1‬ أنا أبويا قالي الدنيا دي خمس دقايق بالتمام هتقضي عمرك كله تايه من البداية للختام هتحب ناس وتسب ناس وتشوف عجايب من البشر والفرح مش هيعلمك الجرح يابني أكبر علام أول دقيقة وأنت عيل لسه سارح في البداية فاكر إن الدنيا جنة وكل حاجة هتتوهبلك تمشي تحلم بكرة ييجي وحلم عمرك يتكتبلك لسه قلبك خام بيلمع ما إتصبغش سواد وهم تطلب الحاجة ببراءة قوم أبوك بيروح يجيبلك لسه عضمك ما إستواش لسه ايدك ناعمة نونو ما إتوجعتش من ظروفك أو قابلت صحاب يخونو قلبك أبيض .. عمرك ابيض ما إتقتلتش أو قتلت الحياة بتضحك لعيل حلمه أكبر من عيونه في الدقيقة التانية تكبر ..شاب وسط العشرينات لسه عنده حاجات جميلة بس جواه جزء مات كان مصدق إنه أقوى وإن كل الكون بتاعه صخرة الواقع يا سيدي كيفها قتل الإنجازات فانت تفهم وقتها في حاجات ينفع تطولها وبرضو مش هتطول حاجات فترة فيها هتتوجع وهتلقى ناس بتحبها يرموك بحزنك وقت ما انت وقفت ليها وجنبها هتشوف بجد إن الحياة مش زي ما إنت فهمتها وأنك ما تحكمش في بشر إلا لو إنت عاشرتها هتروح وتيجي وتتسحل وتحب مرة ومرتين هتخش سكة طويلة وأنت مش عارفها أخرها فين هتلاقي ناس حلوين بجد بيسحبوك ويفرحوك وتلاقي غيرهم ناس كتيرة بتأزي وتبكي العينين والدقيقة التالتة تكبر تبقى واحد ليك كيانك تبقى حوشت إللي باقي ومستعد يموت عشانك إتوجعت كتير زمان وخدت خبرة من الوجع وتبقى عارف إمتى تفتح وإمتى هتقفل بيبانك تفهم إن الدنيا كدبة وان أصدق حاجة فيها هي أهلك اللي شالوا واللي ربوك وأنت ليها بعد ما ضيعت عمرك تشتري في أشخاص باعوك هتلاقيك بتبيع حياتك والجميع وبتشتريها في الدقيقة الرابعة تكبر عجوز مكرمش عوده مال ماشي بالعكاز يخبط بعد ما ربى العيال شايف الدنيا دقايق بيحاربها تزيد شوية وينصح الجيل اللي طالع إيه حرام وإيه حلال صحابه ماتت .. واللي باقي نفس حاله العمر هده بس راضي وعادي يعني ما اللي راح مش جاي قده عياله كبرت .. مشيت وكل واحد شاف طريقه وعمره زاد عن عمر أبوه ما بقاش خلاص يعرف يعده والدقيقة الخامسة وأنت جسم متشال على الحديدة الشريط يتكر تاني وتفتكر أيام بعيدة تبقى سامع وأنت جوة خلق برة بيشتموك وخلق تانية بيمدحوك وانت في الاوضة الجديدة يدخلوا بيك على التراب يفردوك على إللي أنت منه ييجي شيخ يقراله ربع ويدعي لك والذي منه ويسيبوك وحداني تنده على الصحاب والأهل خايف لا انت سامع ولا شايف غير شريط عمرك وزنه والحياة برة هتمشي ومش هتعطل لما تمشي أهلك الناس هتواسيهم ويقولولهم ما تحرمشي يعني البقاء لله يا طيب كان أبوك الحاج طيب مش عملنا خلاص واجبنا يلا نمشي ويسيبوك وحداني تنده على الصحاب والأهل خايف وتقول يا رب وعجبي