Туған жерге сапар

Туған жер — бұл тек адамның дүниеге келген жері ғана емес. Бұл — ата-бабаңның қоныстанған қасиетті мекені, шыр етіп дүниеге келген күніңнен бастап балалық шағың мен жастығың өткен, бүкіл ғұмырыңның тарихы тоғысқан қастерлі өлке. Өзінің өткен тарихын, туған жерін ұмытқан адам — өзін де ұмытады. Тоқбай ата 90 жасқа толған шағында балаларымен бірге туған жеріне сапар шегіп, ата-бабасы мен ата-анасы қоныстанған қасиетті мекендерді аралады. Өзінің алғаш еңбек жолын бастаған ауылын, бірге өскен бауырлары мен туған-туыстарын, балалық шағын бөліскен достарын, қызметтес болған жандарын еске түсіріп, өткен өміріне қайта бір көз жүгіртіп қайтты. «Туған жерге сапар» деп аталатын бұл фильмде Тоқбай атаның өзі туған жері, балалық шағы, өмір жолы мен жүрегінде сақталған естеліктері жайлы сыр шертеді. Туған жерге деген сағыныш пен өткенге деген тағзымға толы бұл сапарды бірге тамашалайық!