មន្ត្រីជាន់ខ្ពស់ក្រសួងធនធានទឹកនិងឧតុនិយម ចុះពិនិត្យវឌ្ឍនភាពនៃការសាងសង់ស្ពានអូរដូង, 119-200926

មន្ត្រីជាន់ខ្ពស់ក្រសួងធនធានទឹកនិងឧតុនិយម ចុះពិនិត្យវឌ្ឍនភាពនៃការសាងសង់ស្ពានអូរដូង និងទំនប់ក្រាយ ក្នុងឃុំម្សាក្រង ស្រុកស្ទោង (កំពង់ធំ)÷ ឯកឧត្តម ឈា ប៊ុនរិទ្ធ  រដ្ឋលេខាធិការប្រចាំការក្រសួងធនធានទឹកនិងឧតុនិយម និងជាប្រធានក្រុមការងារចុះមូលដ្ឋានឃុំម្សាក្រង តំណាងឯកឧត្តម  ថោ ជេដ្ឋា ប្រធានក្រុមការងារចុះមូលដ្ឋានស្រុកស្ទោង ខេត្តកំពង់ធំ បានអញ្ជើញដឹកនាំក្រុមការងារ ចុះពិនិត្យវឌ្ឍនភាពនៃការដ្ឋានសាងសង់ស្ពានអូរដូង និងទំនប់ក្រាយ ដែលស្ថិតក្នុងភូមិសាស្រ្តឃុំម្សាក្រង ស្រុកស្ទោង ខេត្តកំពង់ធំ នាថ្ងៃអាទិត្យ ទី២០ ខែកញ្ញា ឆ្នាំ២០២៦។ ក្នុងឱកាសចុះពិនិត្យនោះដែរ ឯកឧត្តមប្រធានក្រុមការងារ បានមានប្រសាសន៍ថា សមិទ្ធផលហេដ្ឋារចនាសម្ព័ន្ធរូបវន្តថ្មីៗ ដែលកំពុងលេចចេញជារូបរាងនៅលើទឹកដីឃុំម្សាក្រងនាពេលនេះ គឺកើតចេញពីការយកចិត្តទុកដាក់ខ្ពស់ និងការសម្របសម្រួលផ្ទាល់ពីសំណាក់ ឯកឧត្តមរដ្ឋមន្រ្ដី ថោ ជេដ្ឋា ជាមួយបណ្តាក្រសួង និងស្ថាប័នពាក់ព័ន្ធ។ ការខិតខំប្រឹងប្រែងនេះ គឺដើម្បីឆ្លើយតបយ៉ាងទាន់ពេលវេលាទៅនឹងតម្រូវការជាក់ស្តែងរបស់ប្រជាពលរដ្ឋ ព្រមទាំងជំរុញការអភិវឌ្ឍហេដ្ឋារចនាសម្ព័ន្ធក្នុងមូលដ្ឋានឱ្យកាន់តែរីកចម្រើន សម្រួលដល់ការធ្វើដំណើរ ការដឹកជញ្ជូន និងលើកកម្ពស់ជីវភាពរស់នៅរបស់ប្រជាពលរដ្ឋទូទាំងឃុំ។ ជាមួយគ្នានេះដែរឯកឧត្តម ឈា ប៊ុនរិទ្ធ បានផ្តល់អនុសាសន៍ណែនាំ និងអំពាវនាវយ៉ាងទទូចដល់អាជ្ញាធរដែនដីគ្រប់លំដាប់ថ្នាក់ ព្រមទាំងបងប្អូនប្រជាពលរដ្ឋទាំងអស់ក្នុងឃុំម្សាក្រង ឱ្យបង្កើនស្មារតីម្ចាស់ការ ដោយចូលរួមសហការគ្នាថែរក្សា ការពារ និងប្រើប្រាស់រាល់សមិទ្ធផលទាំងអស់នេះ ឱ្យបានគង់វង្ស និងមានចីរភាពយូរអង្វែង ដើម្បីទុកជាប្រយោជន៍រួមសម្រាប់កូនចៅជំនាន់ក្រោយៗទៀត ក្រោមការដឹកនាំ និងការខិតខំប្រឹងប្រែងអភិវឌ្ឍឥតឈប់ឈររបស់គណបក្សប្រជាជនកម្ពុជា៕ អត្ថបទ រដ្ឋបាលស្រុកស្ទោង