گوں دھمی راجمان پتر ءِ باسکاں ، چیئرمین نسیم ءِ بنداتی تْران | توار : کازی ریھان

بلوچ راجی زْرمبشت۔ بی این ایم ءِ سرکماش ڈاکٹر نسیم ءِ گوں راجمان پتر ءِ باسکاں بنداتی تْران چہ درساں پیش من بلوچستان ءِ شھیداں سلام پیش کن آں کہ آیاں وتی زند پہ مئے رژنائیں باندات ءَ نْدر کرتگ۔چہ ایشی ءَ پد پہ چیئرمین ھلیل (خلیل) ءُآئیءِ ٹیم ءَ ستاشانی نْدر کن آں کہ آیاں اے ناگیگیں جاورانی تہ ءَ سوبمندیں رنگے ءَ راجمان پتر ءِ نیاد ایر کرتگ۔ھما کونسلراں کہ آ اے جاوراں چہ بلوچستان ءِ ھمک کنڈ ءَ اد ءَ اتکگ ءُ یکجا بیتگ اَنت آیاں مبارک بہ بیت کہ آیاں ناں ایوک ءَ راجمان پتر ءَ بھر زرتگ بلکیں پہ بی این ایم ءُ بلوچ زْرمبشت ءِ سوبمندی ءَ شور ءُ راھبندانی سر ءَ یکشل ءَ پنچ روچ ءَ گپ ءُ باوست کرتگ ءُ استمانی راھبند ءَ زمہ واری یک دگہ ٹیمے ءِ ڈبو ءَ داتگ اَنت۔ ھمے پیم گچینکاری پتر ءَ گوں ھنرمندی ءُ زانتکاری ءَ باز جْوانیں وڑے ءَ گچینکاری کنائینتگ۔ وتی سیاسی پند ءَ من مدام مزن نام ءُ پرکششیں راھشونانی ھمراہ بیتگ آں، اسکول ءِ زمانگ ءَ ڈاکٹر اللہ نزر ءِ سروکی ءَ آ وھدیگیں بی ایس او مشکے ھنکین ءِ سرکماش جوڑ بیتگ آں، آ وھدے منی گمان ءَ ڈاکٹر اللہ نزر ھما بی ایس او ءِ رسانکدری کارگشاد اَت۔ پد ءَ گوں بی ایس او آزاد ءِ جوڑ کنگ ءَ ڈاکٹر اللہ نزر ءَ ھمراہ بیتگ ءُ آئی ءِ آرگنائزنگ پتر ءَ ھوار بیتگ آں۔چہ ایشی ءَ پد شھید منان جان ءُ چیئرمین ھلیل (خلیل) ءِ راھشونی ءَ پند برگ ءَ آں۔ داں زند ءِ گڈی روچ ءَ اے کارست منی راھدربر اَنت۔ ایشانی کنڈ ءَ گیپت نہ کن آں بلے ایشانی سوج ءُ راھبنداں پہ من راہ پچ کرتگ۔ ھما اگدہ کہ آئی ءِ سر ءَ واجہ گلام مھمد ءُ واجہ ھلیل (خلیل) ءَ کار کرتگ مروچی من ھم ھمے اگدہ ءَ گچین بیتگ آں بلے من آیانی کنڈ ءَ گیپت نہ کن آں۔بلے من ءَ پھر اِنت من ھمیشانی ساھگ ءَ بی این ایم ءَ ھوار بیتگ آں۔فروری 2008 ءَ منی نودربری زند آسر بیتگ اَت ءُ من بی ایم سی نادْراھجاہ ءَ ’ھاؤس جاب ‘ کنگ ءَ اَت آں۔ شھید منان جان ءُ چیئرمین ھلیل پہ وتی گل ءِ کارانی تر ءُ تاب ءَ شال ءَ اتک اَنت ءُ بی ایم سی کمپلکس ھاسٹل ءَ منی کمرہ ءَ منی مھمان بوت اَنت۔دومی روچ ءَ کمیں گپ ءُ تْران ءَ پد من گوں وتی ھما سنگتانی پجیگ ءَ کہ پیش ءَ گوں بی ایس او آزاد ءَ ھوار اَت اَنت ، بی این ایم ءَ ھوار بوت آں۔ گْوشگ ءِ من ھمیش اِنت کہ چاردہ سال پیش من ھما کارست ءِ ساھگ ءَ کسانیں کارکنے ءِ بستار ءَ اے کاروان ءِ بھر بیتگ آں ، مروچی ھما گل ءِ سرکماشی اگدہ ءِ سر ءَ من ءَ کار کنگ ءِ موہ دیگ ءُ چہ من ءَ مسام گرگ ءَ اِنت۔ اے المی ءَ پہ من پھری گپے کہ منی سر ءَ واجہ چیئرمین ھلیل (خلیل) رنگے مردماں باور کنت۔ من گل ءِ اگدہ دار ءُ بنجاھی پتر ءِ باسکاں مبارک باد دئے آن ءُ اوست دار آں کہ ما درس ھمزان ءُ ھمدلی ءَ یک دومی ءَ کمک کنان بی این ایم ءَ مھکم کنگ ءُ بلوچ ءِ توار ءَ میان استمانی واکدارانی ماڑیاں سر کنگ ءَ پرارزشتے کردے پیلو کن ایں۔ھمے پیم پہ ھما کامریڈاں پرمنگھیں دْروت نْدر کن آں کہ آیاں گچینکاری ءِ آسر ءَ وتی دیم ءَ سوبمند بیتگیں امیتوار گلاش کرتگ اَنت ءُ آیانی پجیگ ءَ کار کنگ ءُ آیانی کمک کنگ ءِ سدکی داتگ۔ چہ ایشی ءَ زانگ بیت کہ اد ءَ ھریکے وتی کرد ءَ پیلو کنگ لوٹ ایت۔ اے پارلیمانی سیاست ءُ سیٹانی مردانگیشی نہ اِنت کہ آ اود ءَ امیتوار یک دومے ءِ دژمن جوڑ بہ اَنت۔ اد ءَ دیم پہ دیمی امیتوار دوست اَنت، دوست پْروش دیگ نہ بہ اَنت۔ اد ءَ اگدہ پمیشکا زیرگ نہ بیت کہ کسے آسیدگی ءُ آسراتیانی لوٹوک اِنت بلکیں پہ کارکنگ ءَ اگدہ زیرگ بہ اَنت۔ اد ءَ کسے کہ اگدہ زیر ایت بزاں آ وت ءَ دژمن ءِ مستریں نشانگ جوڑ کنگ ءَ اِنت۔ چیئرمین ھلیل (خلیل) ءَ بی این ایم استمانی راھبند ءَ برجاہ داشتگ ءُ داں مارا سر کرتگ، اے راھبند استمانی ءُ آشوبی بیگ ءِ مستر ءُ شرتریں نشانی اِنت۔اے راھاں پچ کنت ءُ گوں دگراں موہ دیگ ءَ اے گپ ءَ گواچن کنت کہ بی این ایم ءَ کیڈرجوڑ کنگ ءِ کارانی تہ ءَ کمی پشت نہ داتگ۔ بی این ایم ءِ بازیں راھشونانی شھید کنگ ءَ پد ھم بی این ایم ءِ کاروان منزل ءِ نیمگ ءَ جزان اِنت۔ اے پارٹی کسی پت ءُ پیرکی مڈی نہ اِنت ءُ ناں کہ ایشی ءِ تہ ءَ سرداری اِنت کہ آ اود ءَ راہ بند بہ اَنت۔ چیئرمین ھلیل ءِ اے کار ءَ آشوبی بیگ ءِ پجیگ ءَ آ دگہ گامے پیشوک کرتگ۔ نبشتہ کار مروچیگیں گْوستانک ءَ نبیسگ ءَ اِنت۔بی این ایم ءِ گْوستانک ءَ نبیسگ ءَ اِنت۔ بلوچستان ءِ پارلیمانی گلانی گْوستانک ءَ نبیسگ ءَ اِنت۔ آ پہ اے درور ءِ نبیسگ ءَ تشے ھم مامانگو نہ بیت کہ چیئرمین ھلیل ءَ گل توانمند کرتگ ءُ مئے دست ءَ داتگ۔ گْوستانک نبیس پہ اے پیر ءِ شوھاز ءَ ھچ تکانسر نہ بیت کہ ھمے باریگ ءَ لھتے بلوچ گل لھتے مردماں دستیگ کرتگ ءُ نشتگ اَنت۔ باند ءَ منی جاہ ءَ دگرے کئیت ، کاروان ھمے پیم جزان کنت۔ بلوچ راج سنٹ نہ اِنت ءُ بی این ایم کیڈر جوڑ کنگ ءَ اِنت پمیشکا اے میان ءَ پاکستان ءِ زوراکی ءُ ترندیں شونداتاں پد ھم اے راجمان پتر ءَ گل ءِ سوگہ ءُ سرپدی ئیں سراں یکجا نشت کرتگ۔ گیشتر وانگ ءَ ٹیلی گرام ءَ بہ رو اِت : https://t.me/bnmovement/879