Mavluda A'zamova kuylaydi. Mumtoz va xalq qo'shiqlari

Мавлуда Аъзамова куйлайди. Мумтоз ва халқ қўшиқлари / Mavluda A'zamova kuylaydi. Mumtoz va xalq qo‘shiqlari. Mavluda A’zamova 1913 yilda Toshkentda ziyoli oilasida tavallud topgan. Oʻn yoshga kirganda ota-onasidan yetim qolgan va bolalar uyida tarbiyalangan. Oʻsha paytlarda “Koʻk koʻylak” guruhi nom qozongan payt edi. Yosh Mavluda A’zamova oʻsha guruhga qatnashib asta-sekin san’at dargohiga kirib keldi. U toʻgaraklarga qatnashishi bilan birga yangi tashkil qilingan “Namuna” maktabida Shohidaxon Ma’zumova bilan birga oʻqishni davom ettirgan. Keyinchalik bu maktab Nodira nomi bilan yuritilgan. Maktabda oʻqib yurishgan vaqtlarida koʻplab tadbirlarda, bayram konsertlarida muntazam qatnashib kelishgan. Yosh Mavludadagi iqtidorni sezgan Imomjon Ikromov unga xonandalikdan ustozlik qila boshlaydi. U xalq teatrida Ziynat Fatxulinning “Gʻunchalar” pesasida Gulnor obrazini yaratadi va uni muvaffaqiyat bilan ijro etadi. Qayd etish lozimki Mavluda A’zamova birinchilar qatorida ayol obrazini sahnada yaratib oʻynagan san’atkor boʻlib tarixda qoldi. U paytlarda xalq orasida san’atga qarashlar boshqacha boʻlgan. Shuning uchun ayniqsa qizlar, ayollar teatrda juda kam boʻlgan. Ayol obrazlari esa erkaklar tomonidan oʻynalgan. Mavluda A’zamova 1943 yili radio qoshidagi oʻzbek xalq ansambliga ishga keladi va bu yerda ustozlarining sa’yi harakatlari bilan ashulani dutor joʻrligida, oʻzi chalib aytishini oʻrgana boshlaydi. Bu harakatlari unga juda katta muvaffaqiyat olib keldi. Ayniqsa urush yillari Mavluda A’zamova aytgan “Ofarin”, “Yigitlar”, “Munojot”, “Istadim”, “Diloromimni sogʻindim”, “Choʻli Iroq” ashulalari uning ijodi gullab yashnashida birinchi bosqich boʻldi. 1951 yili Mavluda A’zamovaning xizmatlari munosib taqdirlanib, Oʻzbekiston SSRda xizmat koʻrsatgan artist unvoni berildi. Mavluda A’zamova oʻz xalqiga sidqidildan xizmat qilgan fidoiy san’atkor edi. Mavluda A’zamova yuragida oʻti bor, shiddatli, uslubi qaytarilmas, oʻz yoʻliga ega qoʻshiqchi boʻlgan. Mavluda A’zamova qoʻshiqchilik san’atida barhayot siymo boʻlib, abadiy qoladi. Мавлуда Аъзамова 1913 йилда Тошкентда зиёли оиласида таваллуд топган. Ўн ёшга кирганда ота-онасидан етим қолган ва болалар уйида тарбияланган. Ўша пайтларда “Кўк кўйлак” гуруҳи ном қозонган пайт эди. Ёш Мавлуда Аъзамова ўша гуруҳга қатнашиб аста-секин санъат даргоҳига кириб келди. У тўгаракларга қатнашиши билан бирга янги ташкил қилинган “Намуна” мактабида Шоҳидахон Маъзумова билан бирга ўқишни давом эттирган. Кейинчалик бу мактаб Нодира номи билан юритилган. Мактабда ўқиб юришган вақтларида кўплаб тадбирларда, байрам концертларида мунтазам қатнашиб келишган. Ёш Мавлудадаги иқтидорни сезган Имомжон Икромов унга хонандаликдан устозлик қила бошлайди. У халқ театрида Зийнат Фатхулиннинг “Ғунчалар” песасида Гулнор образини яратади ва уни муваффақият билан ижро этади. Қайд этиш лозимки Мавлуда Аъзамова биринчилар қаторида аёл образини саҳнада яратиб ўйнаган санъаткор бўлиб тарихда қолди. У пайтларда халқ орасида санъатга қарашлар бошқача бўлган. Шунинг учун айниқса қизлар, аёллар театрда жуда кам бўлган. Аёл образлари эса эркаклар томонидан ўйналган. Мавлуда Аъзамова 1943 йили радио қошидаги ўзбек халқ ансамблига ишга келади ва бу ерда устозларининг саъйи ҳаракатлари билан ашулани дутор жўрлигида, ўзи чалиб айтишини ўргана бошлайди. Бу ҳаракатлари унга жуда катта муваффақият олиб келди. Айниқса уруш йиллари Мавлуда Аъзамова айтган “Офарин”, “Йигитлар”, “Муножот”, “Истадим”, “Дилоромимни соғиндим”, “Чўли Ироқ” ашулалари унинг ижоди гуллаб яшнашида биринчи босқич бўлди. 1951 йили Мавлуда Аъзамованинг хизматлари муносиб тақдирланиб, Ўзбекистон ССРда хизмат кўрсатган артист унвони берилди. Мавлуда Аъзамова ўз халқига сидқидилдан хизмат қилган фидоий санъаткор эди. Мавлуда Аъзамова юрагида ўти бор, шиддатли, услуби қайтарилмас, ўз йўлига эга қўшиқчи бўлган. Мавлуда Аъзамова қўшиқчилик санъатида барҳаёт сиймо бўлиб, абадий қолади.