احترس من تغيير البوجيهات و الموتور ساخن

اولا و الموتور سخن ممكن نأذي نفسنا جدا سواء لو مسكنا البوجيهات نفسها اللي بتكون سخنه جدا و ممكن تحرق أيدينا او أننا نلمس اي مكان سخن في العربية و نأذي نفسنا مع إننا ممكن نصبر نص ساعه او ساعه و نشتغل في امان و تاني حاجه بقي اننا بنتعامل مع معادن مختلفة ما بين حديد و زهر و الومنيوم و طبعا كلنا عارفين أن المعادن بتتمدد بالحرارة و اكيد كل الاجزاء دلوقتي متمددة و غير كده بيكون فيها نسبة ليونة و علشان كده ممكن و احنا بنفك أي جزء في المحرك وارد جدا اننا نقطم مسمار أو قطعة من المحرك او البوجيه نفسه و بكده هنروح لمشكلة أكبر بقي و اننا هنحتاج نفك وش السلندر كله علشان نطلع منه الجزء المقطوم ده اما تالت حاجه بقي لو الدنيا مشيت معانا كويس و فكينا البوجيهات الحمد لله و مسكناها من غير ما نحرق أيدينا و جينا نركب بقي البوجيهات الجديدة اللي هي باردة بالنسبة للمكان اللي هتتربط فيه اول حاجه لاحظ انك بتربط في الومنيوم و من المعروف أن الالومنيوم اضعف من الحديد و بالتالي احتمال كبير و انت بتربط البوجيه الجديد و تشد عليه تلاقه السن اللي بيربط فيه في وش السلندر فوت اصلا و تلاقي البوجيه بقي بيلف علي الفاضي و مش بيثبت مكانه و في الحاله دي بردو هتحتاج تفك وش السلندر كله و توديه مخرطه علشان تعالج الموضوع بأنها تعمل جلبة نحاس و تركبها مكان السن اللي باظ علشان تعرف تربط فيه البوجيه بعد كده و اعتقد اننا كلنا في غني عن الموضوع ده كله و بالاخص ان الموضوع مش مستاهل .. كل القصة اننا هنصبر بس نص ساعه لساعه مش اكتر نيجي بقي لملاحظة أخيرة … اننا زي ما قولنا بنربط في الومنيوم يعني ناخد بالنا اوي في موضوع الشد علي البوجيهات بعد الربط اوعي تستعمل قوتك المفرطه و تتعافي على قطعة المعدن الصغيره دي لان هي اصلا ليها مقاس للشد و ده بيكون حسب تعليمات الشركة المصنعة … و بنستعمل مفتاح عزم علشان نربط البوجيهات بالدقة دي اما لو انت زي اغلب الناس اللي متعرفش حاجه عن تعليمات الشركة المصنعة … فحاول بالنسبة للبوجيهات الجديدة و انت بتشد متزودش عن زاوية من 120 لـ 180 يعني نص لفه بالكتير او اقل شوية .. أما لو البوجيهات مش جديدة يبقي كفايه جدا زاوية 30 و علي فكرة الارقام دي مش من عندي دي تعليمات من شركة تويوتا و هيونداي