АСТАНАНЫҢ ХАЛҚЫ 4 МЛН АДАМҒА ЖЕТЕДІ | САРАПТАМА

Еліміздің статистика жөніндегі ұлттық бюросының 1-қыркүйектегі мәліметтеріне сенсек, дәл қазір еліміздің халық саны 20 млн 618 мың 796 адам. Жыл басынан бері тұрғын саны 118 974 адамға өссе, оның бес жарым мыңы шетелден келгендер. Сонымен аңдасақ азбыз. Әлбетте соңғы жылдары демографиялық ахуал тұрақты. Осыдан 5-6 жыл бұрын ғана біз 20 млндық межеге төменнен қарайтынбыз, қазір оны еңсеріп алға қарай кетіп барамыз. Бірақ демография бұл жалпы халықтың саны ғана емес. Статистикалық мәліметтерді өңірлерге бөліп қарайтын болсақ біраз мәселенің басы ашылады. Қандай мәселе? Қай өңірлер өсіп, қай өңірлерге өшу қаупі бар? Қай облыста туу көрсеткіші жоғары, кім қайдан және қайда көшіп жатыр? Халықтың орташа жасы, ұлттың қартаюы немесе жасару тенденциясы қандай? Халқымыздың саны қазіргі қарқынмен өсетін болса, айталық алдағы 10-15 жылда не өзгереді және ең бастысы сапамыз өсе ме? Қала мен даланың тепе-теңдігі сақтала ма әлде жөнсіз урбанизация Астана мен Алматы, Шымкентті тығырыққа тіреп, жарға жыға ма? Әлбетте керегеміздің кеңейіп, санымыздың өскенін бәріміз қалаймыз, бірақ өсіп жатқан халықтың қажеттілігін өтейтін экономикалық әлеует қандай? Біраз қызықты сұрақ бар, бұны да біліп жүргеніміз дұрыс шығар деген пайыммен, осы мәселелерге бір тақырып арнап көрсек. Ендеше ағайын, патша көңілдеріңіздің қалауымен Білген Дұрыс арнасына тіркеліп, біз жасап жүрген сараптамалық шығарылымдарды лайкка лайық деп тапсаңыздар, бастайық. #білгендұрыс #қазақстан #жаңалықтар