Mirugia Elizabeth "Kobarde" (Composicion: Dhaddy Brokke)

Mi Linea Di Bida 1996.🌹 Siguiente y e ultimo cantante/artista cu a forma parti di e CD "Ranchera". Manera mi a yega di trece dilanti caba den comienso di un di e storianan di ranchera, na momento cu mi a cuminsa traha riba e palabranan di e cancionnan, un inspiracion propio a drenta den mi. Na momento cu mi haya e sintimento aki, mi ta pasa man cu papel y blachi y ta laga e sintimento revela su mes. Asina a nace un cancion estilo ranchera cu no tawata planea, ya cu e idea tawata cancionnan existente di ranchera.🌹 Na momento cu Nelson Farah a scucha e cancion, el a cambia e rumbo y a para riba cu e cancion ta bay forma parti di e proyecto. Nelson tawata e persona cu a trece e magnifico idea dilanti, cua cantante pa acerca, ya cu tur cantante tawata tin nan cancion caba. Nelson a menciona Mirugia, manera mi a splica caba, mi rosea a para un rato y a puntra Nelson si tawata e Mirugia cu mi ta pensa di e cancion, "Bon Dia"? Nelson a bisa si y mi curason tawata yena di alegria, pa motibo cu mi a y ta admira Mirugia y nunca tawata tin e placer di conoce.🌹 E dia a yega pa Mirugia graba, ya tur cantante nan cancion tawata graba y Mirugia a cana drenta studio cu su scritura bou su brasa, sigur di su mes y manera mi persona por decifra, cu un trankilidad rond di dje.🌹 Mirugia no a scucha e cancion na e momento ey ainda y nos tur den studio tawata un tiki nervioso. Remy tawata tin su smile y mi a acerca Mirugia y nos a bay den e 'booth', pone nos headphone, pa asina Mirugia scucha e melodia y pa mi persona splic'e e contenido y e corido di e cancion. Mirugia y mi persona tawata tin un headphone ariba orea pa asina nos por a scucha otro. Solange Camelia, segun mi tambe tawata presente, ya cu den casi tur cancion Solange a interpreta e coronan.🌹 Despues di a repasa algun biaha e cancion, mi a sinti ta manera Mirugia a drenta den contenido di e cancion y tawata mescl'e cu sintimentonan cu no solamante a impreciona mi persona, pero tur presente. E cancion aki divinamente tawata pa Mirugia Elizabeth.🌹 Mirugia mes tawata sumamente satisfecho y den un ambiente super positivo nos a keda traha riba e cancion, grabando coro y tratando di pone aki aya un tiki mas emocion y toke special pa por a traspasa e mensahe den tur forma.🌹 Despues cu nos tur a tuma un break chikito pa bin bek hunto scucha e cancion cu un alma mas trankil, nos tur tawata di opinion cu e cancion no tawata falta nada mas.🌹 Den un di e momentonan ey Mirugia a acerca mi, yama mi danki y mi a bisa Mirugia cu tawata Nelson Farah su idea y Mirugia a contesta mi, 'Danki pa a composita e cancion pa mi por a cant'e.' Den e mesun rosea Mirugia a puntra mi si mi tawata na altura caba ki tempo e proyecto lo sali, ya cu e tawata tin un operacion chikito pa bay haci y e no tawata sigur si e por a warda ora e Cd ta ariba Mercado caba of kisas hasie prome. Mi a contesta Mirugia cu ainda nos tin cu mix, ya e lay out a wordo traha caba na Hulanda, pero cu nan mester a bay imprenta ainda. Si Mirugia dicidi di tuma e decision, pa prome lo tin suficiente tempo pa recuperacion segun mi. Mirugia a bisa mi cu e lo mantene mi informa y nos a sigui scucha e cancion den un bon esfera.🌹 Mirugia mester a canta un parti di un otro cancion cu nos tawata grabando ainda y nos a continua cu e grabacion.🌹 Tin biaha mi ta puntra mi mes ki tawata e motibo cu e inspiracion di e cancion aki a drenta mi alma y mi curason? Un propio composicion sin tin interprete pa motibo cu ya tur cancion a wordo scogi y entrega na tur cantante. Manera mi a menciona caba, mi a bisa Nelson, mi por a scucha e bos y e timbre, pero e cancion no tawata tin interprete.🌹 Dianan a pasa y Nelson a bisa mi 'Tomahawk, e proyecto aki ta casi na su final, cuminsa pensa riba e bautismo y laga mi sa. Manera cu tur e cancionnan a wordo manda pa imprenta e CD nan, mi a cuminsa concentra y pidi mi bon Dios, guia pa inspira mi pa cu e bautismo.🌹 Mientras nos tawata den bay bin cu e preparacionnan, den un seconde mi mundo, mi alma y mi curason a para y mi mente a bira scur. Mi a scucha cu Mirugia Elisabeth a fayese despues di su operacion. Mi a busca caminda pa tene pero ya mi team a sostene mi y a guia mi na e auto. Mi a bay den un silencio y tawata manera e mundo a paralisa.🌹 Permiti mi introduci na boso prome cu mi sigui cu e storia, un cantante/artista procedente di Korsou, cu un gran talento, un curason amabel cu segun mi tawata scogi divinamente pa amplia su leyenda prome cu el a haci su transicion. Remarcabel ta cu e cancion aki a wordo scogi unanimamente como e prome cancion di e tres CD nan y tambe cu e cover di e tres CD nan a carga e nomber di e cancion, "Kobarde".🌹 Cantante: Mirugia Elizabeth🌹 Titulo cancion: Kobarde.🌹 Composicion: Dhaddy Brokke.🌹 Produci pa Dhaddy Brokke.🌹 Un produccion di "MAT Records".🌹 Dedica na Nelson Farah.🌹