萬眾同心公益金｜許志安積極籌備十月個唱 魔音女團MYNT首演魅力爆燈

萬眾同心公益金｜許志安積極籌備十月個唱 魔音女團MYNT首演魅力爆燈 慈善籌款節目《萬眾同心公益金》圓滿落幕，許志安、陳潔靈、張與辰、黃博、姚焯菲等多位藝人為籌款載歌載舞落力表演，非常精彩。 安仔將於十月舉行紅館個唱慶祝入行40周年，雖然距離開騷仲有一段時間，不過為咗呈現出最完美嘅演出，令歌迷可以有難忘一夜，安仔已經密鑼緊鼓進行會議。至於會唔會邀請另一半 鄭秀文 做嘉賓？安仔就話目前監製俾咗一個建議，令佢覺得幾啱，就係可以搵唱Band sound嘅歌手合作，佢亦想試下喺音樂上，搵會碰撞出有新鮮感嘅歌手合作。 李彩華呢次就同馬天佑合唱，阿Rain亦向大家預告自己計劃出新歌，將投入收歌階段，同埋會籌備演唱會、音樂會，期望可以喺音樂上發光發熱。阿Rain更透露，新歌方向有可能會係《你唔愛我啦》嘅2.0版本。 一直喺美國攻讀大學嘅 姚焯菲 最近放暑假返嚟香港，亦喺呢晚登上久違嘅舞台演唱新歌。Chantel開心之餘，都坦言心情有少少緊張。而黃博就大讚Chantel新歌歌詞勵志，亦好打動自己。講到喺呢個暑假有咩工作計劃，Chantel就話會宣傳新歌，仲會去加拿大工作添！ 譚俊彥、 張振朗 密密練波為籃球賽做準備，佢哋表示大家唔只練咁簡單，最近每朝都會起身睇波。阿Shaun笑言，大家好熱血，每朝七點就上網Book場，邊個早起身、邊個早收工就負責去Book場。 呢晚係 魔音女團 終極成團6人 倪樂琳、倪嘉雯、莊子璇、宋宛穎、喬美莎、盧映彤 組成嘅女團 MYNT 出道首演，佢哋演唱新歌《Turn My Magic On》，更喺腰上貼上MYNT嘅紋身貼紙，舞台魅力十足！六位成員就同大家介紹，團名係由《魔音女團》英文節目名首字母組成。宋宛穎仲話，MYNT好快就會做 蕭正楠、 曹永廉 同 馬國明 嘅演唱會嘉賓，倪嘉雯、盧映彤都表示心情緊張又興奮。 男團SURFIVE亦喺呢晚表演新歌《POPSTAR》，呢首歌嘅舞仲要係由三位成員去編排。五子都話大家嘅默契因為練舞練到越嚟越好，更預告雖然大家都會有個人工作，但未來會更多以團體身份同粉絲們見面。 #萬眾同心公益金 #許志安 #魔音女團 #MYNT #SURFIVE #譚俊彥 #張振朗 #李彩華 #姚焯菲 #黃博 #演唱會 #嘉賓 #出道首演 #新歌#TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞 即刻Follow TVB 娛樂新聞台 Facebook專頁   / tvbenews   登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0