移英4年 從裸辭走到信仰｜Fason嘅故事｜BN(O) 一關一關過（二）

「我仍然沒有找到答案……但現在的我，已經不再執著於尋找答案了。」 移英之前，Fason覺得香港社會氣氛好壓抑。佢喺香港嗰間公司做咗六年，公司當時正準備撤出香港。啱啱英國開放咗BN(O)簽證，佢就決定一個人嚟英國。 佢想識本地人同講英文嘅朋友，但事情冇佢想像中咁順利，於是一個人揸車周圍去。佢沿住康和郡海岸，一直揸到英格蘭西南盡頭嘅蘭茲角。因為冇工返，要慳錢，佢諗辦法喺架細車入面瞓。返到布里斯托嗰陣，佢嘅積蓄已經用晒，急住搵工。收到offer嗰日，佢英鎊戶口嘅結餘跌到零，連租都冇錢交。 做返程式員之後，有一日返工，佢開始手震、呼吸困難，仲覺得好恐慌。佢開始諗人生究竟有咩意義，帶住呢啲疑問走向信仰。 同樣一個人移英嘅Hinry同Chris，喺曼徹斯特附近Stockport嘅St Mary教堂一帶，一手一腳搞起一個香港同亞洲美食市集。Fason覺得參與市集好有意義，就搬去Stockport幫手，最初喺一個日本美食攤檔燒串燒。而家佢同Hinry同Chris喺同一個教會事工團隊。 《BN(O) 一關一關過》係英國港僑協會製作嘅紀錄片系列，講香港人用BN(O)簽證嚟英國生活，要過啲咩關。