هو ده جزائي إني استثمرت فلوسي في بلدي؟ مصري مغترب يتسائل !

هو ده جزائي إني استثمرت فلوسي في بلدي؟ مصري مغترب، بيشتغل سنين بره البلد، ومتحمل تعب الغربة عشان يجمع فلوس ويرجع يستثمرها في مصر، ويضمن لنفسه ولأسرته مستقبل أفضل. وبالفعل، قرر إنه يستثمر فلوسه في عقار. لكن بعد ما اختار وحدته وبدأ إجراءات التعاقد، اكتشف إن فيه بند في العقد بيحدد التعويض عند العدول عن البيع بنسبة 20% لو مقيم بالخارج، مقابل 10% لو مقيم داخل مصر! تخيل بقى إنك بعد كل سنين الغربة والتعب دي، تلاقي نفسك قدام شرط زي ده. طبيعي تبدأ تسأل: ليه نسبة التعويض مختلفة؟ وإيه المبرر إن مكان إقامتي يفرق في النسبة اللي هتتخصم مني؟ والموضوع مش بيقف عند البند ده بس؛ لأنك لو اكتشفت الشرط وقررت ما تكملش التعاقد، ممكن تواجه خصومات من مبلغ الحجز ، حسب الشروط الواردة في استمارة الحجز. هنا الخطر مش بس في البند اللي اكتشفته.. الخطر الأكبر إنك تكتشفه بعد ما تكون حولت فلوسك والتزمت بالتعاقد. وبالتالي، قبل ما تحوّل فلوسك أو تمضي على أي ورقة، لازم تكون عارف إنت بتوافق على إيه بالظبط ونصيحتى ليك لو بتفكر تشتري عقار في مصر وإنت مقيم بالخارج، ما تستعجلش في التوقيع. راجع بنود العقد واستمارة الحجز كويس، واعرف شروط العدول عن البيع ونسب الخصم، واتأكد من التراخيص وموقف المشروع من الإنشاءات. والأهم، خلي محامٍ متخصص يراجع مستنداتك قبل ما تلتزم مع أي شركة تطوير. فلوس الغربة متجمعتش بالساهل، وبالتالي مش منطقي تسيب قرار زي ده للكلام المعسول اللي بيتقالك من بروكر أو سيلز، لأن اللي هيدفع تمن القرار في النهاية هو إنت، مش الشخص اللي أقنعك تشتري. أخيرا, لو عاوز تستثمر فلوسك في العقار، لازم تتأكد إن استثمارك دا خطوة بتأمّن بيها مستقبلك، مش مخاطرة تكتشف تمنها بعد فوات الأوان. #محمد_أبو_سليم #المصريين_بالخارج #استثمار_عقاري #عقود_العقارات #محامي_عقارات