Уянга хамтлаг - "Шарга морь" баримтат кино / Герман 1999

1999 - 2000 онд Герман улсын Мюнхэн хотын Кино Урлагийн Их Сургуулийн захиалгаар Уянга хамтлагийн "Шарга морь / Das Orangen Pferde" баримтад киног бүтээснийг анхудаа олон нийтэд нээлттэй үзүүлж байна. Тус кино нь нэрт кино найруулагч, олон улсад "Ингэн тэмээний нулимс", "Шар нохойн там" зэрэг киногоороо алдаршсан Даваагийн Бямбасүрэнгийн оюутны ажил юм. Энэхүү Монгол өв соёлоо хүний нутагт танилцуулахын төлөө тэмцэж зүтгэж буй чөлөөт зах зээлийн чөлөөт уран бүтээлчдийн тухай өгүүлнэ. - - - - - - - - - - - - - - - - - - - - Киноны сэдэв: Монгол улсаас Герман улсад ажиллаж амьдарч байгаа Уянга хамтлагийн уран бүтээлчдийн тухай өгүүлнэ. Хамтлагийн гишүүд: Д. Ганпүрэв / Хамтлагийн ахлагч, Их хуур, Хархираа хөөмий Д. Хосбаяр / Хөөмий, Товшуур Ч. Мөнх-Эрдэнэ / ятга, эмэгтэй хоолой Ш. Болдбаатар / Морин хуур Уянга хамтлаг нь 1997 онд байгуулагдсан. Өрнөдийн үзэгчдэд зориулж хамтлагийн бие даасан уран бүтээлээ туурвиж байсан нь монголчуудын өнөөдрийн Этно жазз хөгжмийн урсгалын төрөл зүйлийг бий болгох үндсэн суурь болсон гэж хэлж болно. Уянга хамтлагийн хүндэт гишүүнээр Зууны манлай уртын дууч, АЖ, Хөдөлмөрийн баатар, домогт Н. Норовбанзад гуай ажиллаж байсан. Уянга нэртэй цомогоо уртын дуучин Н. Норовбанзад гуайтай хамтарч 1998 онд бичүүлсэн. Тус хамтлагийн олон улс дахь хамтран ажиллагч агентур нь Волфганг Паукштад. Түүний буруутай үйл ажиллагаанаас Уянга хамтлаг 1999 оны сүүлээр тарсан. Тус хамтлагийн хөөмийч Д. Хосбаяр нь 1999 оны 8 сард Уянга хамтлагаа орхиж Шпайер хотын хөгжмийн продюсер Вернер Гоосын төсөл дээр бие даан ажилласан. Хамтлагийн ахлагч Д. Ганпүрэв нь бусад гишүүдийн хамтаар Герман улсын Вүрцбург хотын Архикулт Броенигийн соёл зуучийн газартай хамтран ажиллах болсон тул хамтлагийн нэрээ сольж "Бөртэ" болгов. Бөртэ хамтлаг нь олон улсын нэр хүндтэй төслүүд дээр 2008 он хүртэл ажиллаад эх орондоо буцав.