အတိုက်အခံတပ်တွေရဲ့အဓိကမြို့တော်ဆီ အီသီယိုးပီးယားအစိုးရတပ်တွေထိုးဖောက် | People's Spring

အတိုက်အခံတပ်တွေရဲ့အဓိကမြို့တော်ဆီ အီသီယိုးပီးယားအစိုးရတပ်တွေထိုးဖောက် အောက်တိုဘာလ- ၄ ၊၂၀၂၆ ။People’s Spring အတိုက်အခံ အင်အားစုတွေ အဓိက ခြေကုပ်ယူရာ ဒေသထဲက မြို့တော်ကို အီသီယိုးပီးယား ဖက်ဒရယ် အစိုးရတပ်တွေ စတင် ဝင်ရောက်နေပြီလို့ သိရပါတယ်။ ဒါကြောင့် အစိုးရကို တော်လှန်နေတဲ့ တိုက်ဂရေး ပြည်သူ့လွတ်မြောက်ရေးတပ် (TPLF)ဟာ တိုက်ဂရေး ပြည်နယ်ရဲ့ မြို့တော် မက်ကီလီကို စတင်စွန့်ခွာနေပြီလို့ ဒေသခံ လူသားချင်း စာနာထောက်ထားမှု ကူညီရေး အဖွဲ့အစည်းတွေက ပြောပါတယ်။ TPLFဟာ တိုက်ဂရေးမှာ အခြေပြုပြီး အီသီယိုးပီးယားမှာ အစိုးရ မဟုတ်တဲ့ လက်နက်ကိုင် တပ်တွေထဲမှာ အင်အားအကြီးဆုံး အဖွဲ့အစည်းတစ်ခု ဖြစ်ပါတယ်။ ပြီးတော့ အရင်ကလည်း အီသီယိုးပီးယား အစိုးရနဲ့ ပြည်တွင်းစစ်ပွဲကို နွှဲခဲ့ဖူးပါတယ်။ စက်တင်ဘာ ၂၃ ရက်နေ့က အီသီယိုးပီးယား မြောက်ပိုင်းမှာ တိုက်ပွဲတွေ ပြန်စလာခဲ့ပြီး TPLFဟာ တိုက်ဂရေးမှာသာ မကဘဲ အနီးတဝိုက် ပြည်နယ်တွေမှာပါ ထိုးစစ်တွေ ဆင်နွှဲခဲ့ပါတယ်။ စစ်ရေး ပဋိပက္ခတွေက ခပ်မြန်မြန် အရှိန်မြင့်တက်လာတဲ့နောက် ၂၀၂၀ ကနေ ၂၀၂၂ ခုနှစ်ထိ ဖြစ်ပွားခဲ့ပြီး ထိခိုက်ပျက်စီးမှုတွေ အရမ်းများပြားခဲ့တဲ့ ပြည်တွင်းစစ်မီး တကျော့ပြန် တောက်လောင်လာမှာကို ပြည်သူတွေက စိုးရိမ်နေပါတယ်။ ပြီးခဲ့တဲ့ ရက်ပိုင်းမှာတော့ အစိုးရတပ်တွေနဲ့ မဟာမိတ် လက်နက်ကိုင် အဖွဲ့အစည်းတွေဟာ TPLFရဲ့ ထိုးစစ်တွေကို တွန်းလှန်ပြီး မက်ကီလီမြို့ တည်ရှိရာ မြောက်ဖက်ဆီ ရှေ့တိုး ချီတက်နေကြောင်း သိရပါတယ်။ ဖက်ဒရယ် အစိုးရ တပ်တွေနဲ့ မဟာမိတ်တွေကို အခုအခါ မက်ကီလီမြို့ နယ်နိမိတ်ထဲမှာ စပြီး တွေ့မြင်လာရပြီဖြစ်ကြောင်း ဒေသခံ လူမှုကယ်ဆယ်ရေး အဖွဲ့တစ်ခုရဲ့ တာဝန်ရှိသူ တစ်ဦးက ပြောပါတယ်။ မြို့ခံ ဂျာနယ်လစ် တစ်ဦးကလည်း အောက်တိုဘာ ၃ ရက်နေ့မှာ TPLF တပ်တွေနဲ့ ခေါင်းဆောင်ပိုင်းဟာ မက်ကီလီကို စတင် စွန့်ခွာသွားကြကြောင်း ပြောကြားခဲ့ပါတယ်။ TPLF ထိန်းချုပ်ထားခဲ့ရာ အစိုးရ အဆောက်အအုံတွေ၊ ရဲစခန်းတွေဟာ အစောင့်အကြပ် မရှိဘဲ ချန်ထားခံခဲ့ရပါတယ်။ တိုက်ပွဲတွေ စလာကတည်းက တိုက်ဂရေး ပြည်နယ်ထဲမှာ ဖုန်းနဲ့ အင်တာနက် ကွန်ရက်တွေ ဆိုးဆိုးရွားရွား ပြတ်တောက်တာ၊ နှေးကွေးတာတွေ ဖြစ်နေတာကြောင့် အသေးစိတ် အခြေအနေတွေကိုတော့ မသိရသေးပါဘူး။ မြို့ထဲမှာ လုံခြုံရေး အခြေအနေက အရမ်းဆိုးနေပြီး လုယက်မှုတွေ ဖြစ်လာမှာကိုလည်း ဒေသခံတွေက စိုးရိမ်နေပါတယ်။ တိုက်ဂရေးရဲ့ စစ်ဆင်ရေးတွေနဲ့ ပတ်သက်လို့ ဖက်ဒရယ် အစိုးရအဖွဲ့ ဝန်ကြီးချုပ် အဘီအာမက်ရော၊ TPLFဖက်ကပါ ဘာမှတ်ချက်မှ မပေးသေးပါဘူး။ TPLFဟာ တိုက်ဂရေး ဒေသမှာ အားအကောင်းဆုံး လက်နက်ကိုင် အင်အားစုဖြစ်ပြီး အခုနှစ်ဆန်းပိုင်းမှာတော့ အစိုးရက ခန့်အပ်ထားတဲ့ အုပ်ချုပ်မှု စနစ်ကို ဖျက်သိမ်းပစ်ခဲ့ပါတယ်။ ===== နယ်စပ်က ပစ်ခတ်မှု တစ်ခုအတွက် အိန္ဒိယနဲ့ ပါကစ္စတန်က အပြန်အလှန်ကန့်ကွက် အောက်တိုဘာလ- ၄ ၊၂၀၂၆ ။People’s Spring နယ်စပ်မှာ ဖြစ်ပွားခဲ့တဲ့ ပြဿနာ တစ်ခုနဲ့ ပတ်သက်လို့ အိန္ဒိယနဲ့ ပါကစ္စတန်တို့က သံအမတ်တွေကို အပြန်အလှန် ဆင့်ခေါ်ပြီး ကန့်ကွက်ခဲ့ကြပါတယ်။ အောက်တိုဘာ ၂ ရက်နေ့တုန်းက ဖြစ်ရပ်မှာ အိန္ဒိယ စစ်သားတွေက လက်နက်မဲ့ ပါကစ္စတန် ပြည်သူနှစ်ဦးကို ပစ်သတ်ခဲ့တယ်လို့ ပါကစ္စတန်က စွပ်စွဲပါတယ်။ အိန္ဒိယကတော့ အဲဒီနှစ်ယောက်ဟာ အိန္ဒိယ ပိုင်နက်ထဲ တရားမဝင် ကျူးကျော် ဝင်ရောက်ခဲ့ကြသူတွေလို့ တုံ့ပြန်ခဲ့ပါတယ်။ ဘီဒီယန် နယ်စပ်ဧရိယာနားမှာ အိန္ဒိယ နယ်ခြားစောင့်တပ်ရဲ့ လက်နက်ကိုင် စစ်သားတွေဟာ လက်နက်မဲ့ ပါကစ္စတန် အရပ်သား နှစ်ဦးကို အကြောင်းမဲ့ ပစ်သတ်ခဲ့တယ်လို့ ပါကစ္စတန် နိုင်ငံခြားရေး ဝန်ကြီးဌာနက အောက်တိုဘာ ၃ ရက်နေ့မှာ ထုတ်ပြန်ပါတယ်။ သေဆုံးသူတွေကို ပိုင်နက်ကျူးလွန် ဝင်ရောက်သူတွေအဖြစ် အိန္ဒိယရဲ့ မှားယွင်း ယိုးစွပ်မှုကိုလည်း ပါကစ္စတန်က ပြင်းပြင်းထန်ထန် ကန့်ကွက်တယ်လို့ ထုတ်ပြန်ချက်မှာ ပါရှိခဲ့ပါတယ်။ အဲဒီကိစ္စနဲ့ ပတ်သက်လို့ အစ္စလာမ်မာဘတ် မြို့မှာရှိတဲ့ အိန္ဒိယသံရုံး တာဝန်ခံ အရာရှိကိုလည်း ဆင့်ခေါ်ပြီး ကန့်ကွက်စကား ဆိုခဲ့သလို ဖြစ်စဉ်အပေါ် ပွင့်လင်းမြင်သာမှုရှိပြီး ယုံကြည်ရတဲ့ စုံစမ်းစစ်ဆေးမှုမျိုး ချက်ချင်း လုပ်ဆောင်ပေးဖို့ တောင်းဆိုခဲ့ကြောင်း ပါကစ္စတန် နိုင်ငံခြားရေး ဝန်ကြီးဌာနက ဆိုပါတယ်။ သိပ်မကြာခင်မှာပဲ အိန္ဒိယ နိုင်ငံခြားရေး ဝန်ကြီးဌာနကလည်း ပါကစ္စတန်ရဲ့ စွပ်စွဲချက်ဟာ အခြေအမြစ် ကင်းမဲ့ပြီး ပြဿနာဖြစ်အောင် လှုံ့ဆော်ထားတာလို့ တုံ့ပြန်ခဲ့ပါတယ်။ ပြီးတော့ ပါကစ္စတန်ရဲ့ သံရုံးအကြီးအကဲကိုလည်း အိန္ဒိယက ဆင့်ခေါ်ပြီး တရားမဝင် နယ်စပ်ဖြတ်ကျော် ဝင်ရောက်မှုတွေကို ပါကစ္စတန်ဖက်က တားဆီးပေးဖို့ တောင်းဆိုခဲ့ပါတယ်။ အိန္ဒိယရဲ့ အဆိုအရ ပါကစ္စတန်ဖက်က စုစုပေါင်း လူသုံးဦးဟာ ဖီရိုဇီပူရနားမှာ အိန္ဒိယ နယ်စပ်ကို ကျော်လာခဲ့ပြီး နယ်ခြားစောင့်တွေ အကြိမ်ကြိမ် သတိပေးနေတဲ့ ကြားကနေ ဂရုမစိုက်ဘဲ နယ်စပ်စည်းရိုးနားကို ချဉ်းကပ်ခဲ့ကြောင်း၊ ဒါကြောင့်လည်း နယ်ခြားစောင့် စစ်သားတွေဟာ လုံခြုံရေး ခြိမ်းခြောက်ခံရမှုအဖြစ် သတ်မှတ်ခဲ့ပြီး မဖြစ်မနေ လိုအပ်သလို တုံ့ပြန်ခဲ့ရကြောင်း သိရပါတယ်။ ဒီကိစ္စဟာ ပါကစ္စတန် အခြေစိုက် မူးယစ်မှောင်ခို လုပ်ငန်းတွေက တရားမဝင် နယ်စပ်ဖြတ်ကျော် ဝင်ရောက်မှုတွေ အကြိမ်ကြိမ် လုပ်ဆောင်နေတယ်ဆိုတာ ရှင်းလင်းမြင်သာတဲ့ နောက်ထပ် သာဓက တစ်ခုလို့လည်း အိန္ဒိယက စွပ်စွဲခဲ့ပါတယ်။ ပါကစ္စတန် အနေနဲ့ နိုင်ငံတကာ နယ်နိမိတ် သတ်မှတ်ချက်ကို လေးစားဖို့၊ ပါကစ္စတန်ဖက်ကနေ တရားမဝင် နယ်စပ်ဖြတ်ကျော် ဝင်ရောက်မှုတွေ မရှိတာ သေချာအောင် ကြပ်မတ်ပေးဖို့လည်း အိန္ဒိယက တောင်းဆိုခဲ့ပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #အီသီယိုးပီးယား #တိုက်ဂရေး #မက်ကီလီ #TPLF #စစ်ရေးသတင်း #ပြည်တွင်းစစ် #Ethiopia #Tigray #Mekelle #TPLF #EthiopiaConflict #InternationalNews #BreakingNews #အိန္ဒိယ #ပါကစ္စတန် #နယ်စပ်ပစ်ခတ်မှု #နိုင်ငံတကာရေးရာ #သံတမန်ရေး #India #Pakistan #IndiaPakistanBorder #BorderClash #Diplomacy #SouthAsia #InternationalNews