“НИЁИШ” аз маҷмӯаи шеърҳои маснавӣ “Чашмаи ташна”-и Мавҷигули Зардодхон

“НИЁИШ” -аз маҷмӯаи шеърҳои маснавӣ: ,,Чашмаи ташна’’-и Мавҷигули Зардодхон Пешгуфтор барои НИЁИШ Ин навишта нолаи ороме нест, балки дуоест, ки аз амиқи дил бармехезад. Садои инсонест, ки миёни фикр ва имон, миёни дард ва умед, даст ба осмон бардоштааст. Ин ҷо шеър барои зебоӣ гуфта нашудааст, балки барои сабук шудани сина, барои он ки дил дар суҷуд бишканад ва боз ҷамъ шавад. Ҳар мисраъ иқрор аст, ҳар калима илтиҷо, ва ҳар оҳ роҳе сӯйи нур. Ин пешгуфтор даъватест ба хондани шеър на бо чашм, балки бо дил. Зеро ин қисса, қиссаи як нафар нест — қиссаи ҳар дилест, ки шабе ба Худо наздик шудааст. ****** Ё Худои меҳрубон дастам бигир, Ман ба банди фикру дил монда асир. Дарди ман аз ҳад фузун, суре фирист, Ё ба шабҳои дилам нуре фирист. То ба поён оварам ин қиссаро, Бар дили шуридаам ёбам даво. Гар нагуям сина таркад 3-оҳи дил, Мондаам аз гуфтаҳоям по ба гил. Ту гиреҳро даркушо аз ҷони ман, Пайраҳе пайдо кунад имони ман. *** Қиссаро аз қиссагӯ дорам баён, Дарди худро ҳам ҳамесозам аён. Дарди ман ҳам қиссае аз қиссаҳо, Дарди ман ҳам ҳиссае аз ҳиссаҳо... Дар намози шоми худ дорам ният, Руҳу тан аз одамӣ бошад сиҳат. Сар ба пешат бо ният орам фуруд, Ҳам ниятҳо кардаам пеш аз суҷуд... Мавҷигул , (Хоруғ -1992) ( *дар навор “Имшаб биё бишин, ки Шаби Қадр аст”*_ мисра аз Зиёи Мамадамин) шеър#ривоят# чашмаиташна#қироъат#SufiMusic#Meditatoin#Rumi#Zikr#SpiritualMusic #