मिन भी देखी ज्वनी पाणी बगदू रे

मिन भी देखी पहाडु की ज्वानी पाणी बौगदु रे , तुमुन भी देखी होली देखी होली कि ना..... हराभरा बण बुग्याळ छा , गोरू भैसौं की छानी छै, बावन गढु कु देश राजा छै राणी छै , बांजा पडी राज पाठ टीहरी डुबदु देखी रे.....बारह मैने कई तीज त्यौहार, बसंत छै बहार छै,थौळ कौथिग मेळा मंडाण , थड्या चौफुला झुमेला रे, हर्च गैनी रीती रिवाज, बणांग लगदु देखी रे........ मोटु लाणु मोटु खाणु, मिठु बोलण बच्याण छौ,मनखी देवतौ समान गौं देवतौं कु थान छौ, बयाळ फैली संगता, केदार रडदु देखी रे....... वीर भडु कु देश , कर्मवीरू की भूमि छै, गंगोत्री यमुनोत्री बद्री केदार बडी पुण्य भूमि छै , राजनीती की भेट चढी , ठेका खुलदु देखी रे.... स्वरचित-संजय कृष्ण ध्यानी