"ምስ ፀላኢ ዝውዕል ኣዛዚ ክፍለሰራዊት!"

#15 ሬድዮ ርክባት ሒዙ ናብ ብፆቱ ዝመረሸ ደፋር እዩ።ኣብ ወረዳ እንደርታ ከባቢ ቶጎጋ ጣብያ ኣማኒት ተወሊዱ ዓብዩ። ብትምህርቱ ሓዊ ከምዝነበረ ይንገረሉ። ኣብ ፋብሪካ ሽኮር ወልቃይት እንትሰርሕ 'ውን ኣብ ትግራይ ማንም ዘይኽእሎ በይኑ ዝመልኮ ሞያ ወኒኑ ብዓርሰ እምነት ይሰርሕ ነይሩ። እንትጋደል ብኽልተ ፍቓድ ደብዳቤ ይንቀሳቐስ ነይሩ፤ ብናይ ፀላእን ወገንን። ፀላኢ ኣብ ጓጓ መቐለ ከሎ #15 ሬድዮ ርክባት ሒዙ ናብ ብፆቱ ዝመረሸ ደፋር እዩ። እዚ ጥራሕ ኣይኮነን፤ ኣብ በረኻ ትውግእ ውዒሉ ናብ ከተማ ስቪል መሲሉ ይኣቱ፣ ሓሚሙ ድማ ፀላኢ ኣብኡ ከሎ ኣብ ዓይደር ተሓኪሙ ይኸድ። ኣብ ገድሊ ብዝፈፀሞም መደምም ጅግንነት ካብ ተራ ኣባል ተበጊሱ ኣዛዚ ክፍለሰራዊት ንምዃን ዝበቐዐ ነብሪ እዩ። ጋሻና ተጋዳላይ ኣለማት ወ/ማርያም ይብሃል። እንሆ ታሪኽ።