Ashugh Nazeli - Mosh achqer (Armenian song)

Աշուղ Նազելիի «Մոշ աչքեր» երգն է՝ իր իսկ կատարմամբ: Այս երգի տեղծման ժամանակահատվածում Աշուղ Նազելին համագործակցում էր «Սայաթ-Նովա» աշուղական երգի անսամբլի հետ, երգում Սայաթ-Նովայի երգերը, որի տաղաչափությունը խոր արմատներ գցեց իր հոգում: Դրա արդյունքում թրծվեց երգչուհին՝ դառնալով Աշուղ Նազելի: Մեկը մյուսի հետևից ծնվում են մերօրյա աշուղի գեղեցիկ երգերը: Այն ընթացքում, երբ հանրությանը հայտնի էր դարձել Աշուղ Նազելիի հերթական երկու նոր երգը՝ «Կարմիր վարդի ալն եմ սիրում» և «Մոշ աչքեր», նրան սկսում են առաջարկել տեսահոլովակ նկարահանել իր երգերից մեկի հիման վրա: Եվ հեղինակի ընտրությունը կանգնում է «Մոշ աչքեր»-ի վրա: Պատճառն այն է, որ «Կարմիր վարդի ալն եմ սիրում» երգը շուտով ձեռք բերեց լայն ճանաչում, այն հնչում էր տարբեր նախագծերի ժամանակ, և Աշուղ Նազելին նպատակ դրեց ճանաչում բերել նաև իր այս մյուս երգին: «Ես շատ սիրում էի մեր սարերից մոշ հավաքել, - պատմում է Աշուղ Նազելին, - մեր Նեյեմբերյանի անտառներում լիքը մոշ կար: Եվ դպրոցական տարիներին հաճախ էինք գնում, դույլերով հավաքում, բերում: Եվ հորեղբորս կինն ասում էր. «Դու՝ սև, մազերդ՝ սև, աչքերդ՝ սև, դու՝ մոշ, մազերդ՝ մոշ, աչքերդ՝ մոշ»: Եվ այդպես «մոշ աչքեր» արտահայտությունը հիշողությանս մեջ տպավորվել էր, որն էլ մեղեդի առավ ու դարձավ երգ: Մի նգամ ամուսինս հարցրեց, թե՝ ինչու մոշ աչքեր: Ես բացատրեցի, որ դա պարզապես նշանակում է սև աչքեր, և շատ գեղեցիկ համեմատություն է: Իսկ ամուսնուս աչքերը կանաչ են: Եվ հեգնական տոնով հարցրեց. «Իսկ ո՞ւմ մասին է այդ երգը» Ասացի. «Բոլոր սև աչքեր ունեցող տղաների» «Դե իհա՜րկե, - բացականչեց նա, - ամուսնու աչքերը կանաչ են, իսկ ինքը գովերգում է սև աչքերով տղաներին»»: Տեսահոլովակի նկարահանումից հետո այս երգը նույնպես շատ սիրվում է ու ձեռք բերում լայն ճանաչում, ընդգրկվում տարբեր երգիչների երգացանկ: Երգի խոսքերը՝ Քո աչքերի անուշ սևին Լոռվա սարի մոշ եմ ասում, Խեթ հայացքիդ կտրող թրին Մոշի թփի փուշ եմ ասում, Ու թե մոլոր կթափառես Մեր տուն բերող ճամփաներում, Լոռվա սարի թևը դեղին, Վիրավոր հավք, ղուշ եմ ասում: Մի նեղանա դու ինձանից, Որ չեմ կարող հետդ խոսել, Հայ աղջկան ե՞րբ է վայել՝ Սրտի խոսքը բարձր ասել, Բայց մեր սարի մրգերի պես Իմ սիրտն էլ է արդեն հասել, Սիրո տված քո խոստումին Սրտիս միջին հուշ եմ ասում: Մի սառեցրու սիրտդ ինձնից Հարսնաքարի ձյուների պես, Մի՛ պղտորի, մի՛ վարարի «Օխտն» աղբյուրի ջրերի պես, Քո Նազելին նազ է անում Լոռվա սարի սմբուլի պես, Մի՛ վախենա, քեզնից թաքուն, Քեզ, իմ յար, անուշ եմ ասում: