هذه قصتي.. أكبر غلط درت في حياتي

أكبر غلط درت في القناة… أكبر غلط درت في القناة، وكان من الأسباب اللي خلات حياتي تتبدل بشكل كبير مؤخراً، هو نهار قررت نشارك مع متابعين القناة مرضي وقصتي، بعد غياب دام تقريباً سنة. ذنبي الوحيد هو أنني تربيت على الصراحة والعفوية، وما عمري كنت كنحب التصنع في حياتي. نهار رجعت للقناة بعد غياب طويل، سولوني بعض الأصدقاء على سبب الغياب، وبكل عفوية وصراحة قلت ليهم بأنني كنت مريض، ودزت من ظروف صعبة. كنت كنظن بأنني درت الصح… وكنت كنشوفكم بحال خوتي، وقلت بيني وبين راسي: علاش ما نشاركش مع الناس اللي كنحترمهم الأخبار ديالي كما هي؟ عمري توقعت أن مشاركة جزء من حياتي مع أشخاص كنت كنحسبهم خوتي، غادي تخلي البعض يبعد على القناة من بعد ما عرف قصتي، والبعض الآخر يستعمل المرض والظروف ديالي باش يهاجمني وينقص مني بكل قسوة. اليوم فهمت واحد الدرس قاسٍ في الحياة: ماشي كل شخص كتفتح ليه قلبك، غادي يحافظ على أسرارك، وماشي كل شخص كتعتبره خاك، غادي يعاملك بنفس النية اللي عاملتيه بها. للأسف، كاينين ناس كيستعملو المعلومات اللي عرفوها عليك كسلاح ضدك، وكيستغلو أصعب اللحظات اللي دزتي منها باش يجرحوك أو يحاولو ينقصو من قيمتك. والأصعب من هاد الشي كامل، هو ملي كتكتشف أن بعض الناس كيبقاو حدّاك غير فاش كتكون واقف على رجليك وناجح… ولكن فاش كتطيح، كتلقى كل واحد مشى فطريقو. وهذا بالضبط اللي وقع ليا. نهار كنت بصحتي، وعندي خدمتي، والقناة كتدخل ليا رزقي، وكنت عايش الحمد لله واحد المرحلة زوينة وسعيدة، كانو ناس كثيرين حولي. ولكن ملي مرضت، ودزت من المشاكل، وتبدلات ظروفي، اختفى عدد من أصدقاء الماضي، سواء من الواقع أو من مواقع التواصل. ولكن في المقابل، الحياة عرفتني على ناس آخرين ما كنتش عارفهم قبل، وما عرفونيش فاش كنت ناجح ولا فاش كانت عندي الإمكانيات. ناس تعرفت عليهم في أصعب وقت، ومع ذلك لقيتهم واقفين جنبي، بالسؤال، بالكلمة الطيبة، وبالمساعدة. وهنا عرفت بأن قيمة الإنسان ما كتقاسش بعدد الناس اللي كيتصورو معاه فاش يكون ناجح، وإنما كتظهر فـ شكون كيبقى واقف معاه ملي كيطيح. لذلك، لكل أخ وأخت وقفوا معايا في هاد الفترة الصعبة، ولكل شخص سأل عليا، دعا معايا، شجعني، أو ساعدني بما استطاع: شكراً من القلب. ❤️ في الوقت اللي طحت فيه وما بقى عندي من بعد الله سبحانه وتعالى، والوالدين، غير الناس اللي وقفوا معايا، كنتو أنتم السند ديالي. جزاكم الله عني خير الجزاء، وربي يفرحكم ويسعدكم ويعطيكم على قد نيتكم. ☝️❤️ أما أنا، فغادي نبقى نؤمن أن الصراحة والعفوية ماشي عيب… ولكن تعلمت أن ماشي كلشي يستحق يعرف تفاصيل حياتك. #نورالدين_البخشوش #قصتي #المغرب #رحالة_مغربي #محمد_السادس #المنتخب_المغربي #الصحراء_المغربية #الجزائر #مصر #البرلمان_المغربي #اخنوش #المنصوري #الحكومة_المغربية #بنكيران #بوريطة