“Чингис хаан ба Монголчуудын ертөнц” олон улсын тусгай үзэсгэлэн нээлтээ хийлээ

Монгол Улсын Ерөнхийлөгч Ухнаагийн Хүрэлсүхийн урилгаар ХБНГУ-ын Ерөнхийлөгч Ф.В.Штайнмайэр Монгол Улсад төрийн айлчлалыг 2024 онд хийх үеэр Соёл, урлагийн газар, Германы Үндэсний музейн нэгдэл болон Пруссийн соёлын өвийн сан, Өвөг ба эртний түүхийн музей хооронд харилцан ойлголцлын санамж бичиг байгуулж, музейд хамтарсан үзэсгэлэн зохион байгуулах асуудлаар тохиролцож байсан. Энэ үеэс хойш Чингис хаан Үндэсний музейн захирал С.Чулуун олон улсын үзэсгэлэнг дэлхийн нэр хүндтэй музейд гаргахыг зорьж Берлиний өвөг түүхийн музейн захирал Матисс Бемхофтой удаа дараа уулзаж, хоёр улсын Ерөнхийлөгчийн ивээл дор“Чингис хаан ба Монголчуудын ертөнц” олон улсын үзэсгэлэнг алдарт Симон галларейн танхимд гаргахаар болж, бэлтгэл ажлыг өнгөрсөн хугацаанд тасралтгүй ханган ажилласан. Үүний үр дүнд Монгол Улсын Ерөнхийлөгч У.Хүрэлсүхийн Герман улсад хийж буй төрийн айлчлалын хүрээнд “Чингис хаан ба Монголчуудын ертөнц” олон улсын тусгай үзэсгэлэнг Берлиний музейн арал ЮНЕСКО-ийн Дэлхийн өвд бүртгэлтэй дэлхийн соёлын голомт газар болох “Жеймс Симон” галерейд дэлгэж нээлтээ хийлээ. Энэ удаагийн Берлин хотод зохион байгуулагдаж байгаа үзэсгэлэн нь хамрах хүрээ, оролцож буй үзмэрийн агуулга, тоо хэмжээ, өргөн хүрээний олон асуудлыг багтааж бусад улсад гаргаж буй үзэсгэлэнгүүдээс хамгийн томоохон нь болж байгаагаараа ихээхэн онцлогтой. Үзэсгэлэнд Германд байгаа Монголын түүх соёлтой холбоотой ховор нандин олон дурсгалууд, алдарт Турфаны цуглуулга, Иль хаант улсын үеийн чимэглэл зургууд, Монголын түүх, шашин, угсаатны зүй, соёлтой холбоотой бичгийн болон эд өлгийн зүйлсийн баялаг цуглуулгууд дэлгэгдсэн. Монгол-Германы хамтарсан археологийн экспедицийн 30 жилийг тохиолдуулан гаргасан тусгай үзэсгэлэн нь Монгол Улсад сүүлийн 30 гаруй жил хийгдсэн малтлага судалгааны үр дүнг харуулахыг зорьсон байна Энэхүү үзэсгэлэн нь Эзэн Богд Чингис хаан, Монголын эзэнт гүрний түүх, нүүдэлчдийн өв соёл, Монголчуудын хүн төрөлхтний хөгжилд оруулсан хувь нэмрийг Европ төдийгүй дэлхий нийтэд таниулах өргөн цар хүрээтэй үзэсгэлэн төдийгүй Монгол, Германы соёлын харилцааг шинэ шатанд гаргахад ач холбогдолтой юм.