უხილავი ფერები - ქართული ხის მეჩეთები

დღეს მუსლიმი თემი რამადანის მარხვის დასრულების დღესასწაულს აღნიშნავს. ამ დღის აღსანიშნად და მუსლიმი თემის პატივისცემის ნიშნად სოციალური სამართლიანობის ცენტრი აქვეყნებს, მისი მხარდაჭერით 2023 წელს გადაღებულ ფილმს - "უხილავი ფერები – ქართული ხის მეჩეთები.“ 🎬 დოკუმენტური ფილმის რეჟისორია - ქეთი მაღრაძე. 👤 მთავარი გმირი - ნესტან ანანიძე. მაღალმთიანი აჭარის სოფლებში ჩვენ შევხვდებით არა ერთ ხის მეჩეთებს, რომელიც ქართული ისლამური კულტურის უნიკალური ძეგლია. ხის უნიკალურ მეჩეთებზე როგორც წესი ლაზი ოსტატები მუშაობდნენ და ის ქართული და ისლამური კულტურის ულამაზესს სინთეზს და მრავალფეროვნებას აჩვენებს. მეჩეთების ნაწილი დღესაც ფუნქციონირებს, თუმცა უმეტესობას არც კულტურული მემკვიდრეობის სტატუსი აქვს და არც სათანადო სახელმწიფო მხარდაჭერა. მეჩეთების დიდი ნაწილი ნგრევის პირასაა, ან უკვე დაინგრა, დაიწვა და განადგურა. მათი ნაწილი კი სასწრაფოდ საჭიროებს დაცვასა და აღდგენას. კულტურის არსებული პოლიტიკა ნაკლებად ცდილობს ქართული ისლამური კულტურის აღიარებას, წარმოჩენას და პატივისცემას და მისი გაქრობისა და კვალის წაშლის მდუმარე განზრახვას ატარებს. ხის მეჩეთების მიმართ პოლიტიკა გამოხატავს არაღიარებისა და უთანასწორობის იმ პოლიტიკას, რომელიც სახელმწიფოს საქართველოში მუსლიმი თემის მიმართ აქვს. სახელმწიფო არა მხოლოდ არ იცავს სათანადოდ ჩვენი მუსლიმი მოქალაქეების უფლებებს და მათ კულტურულ და რელიგიურ რეპრეზენტაციას, არამედ მუდმივად ამყოფებს კონტროლისა და წნეხის პირობებში. განსაკუთრებით თვალშისაცემი ეს ქართველი მუსლიმი თემის მიმართ გამოვლენილი რელიგიური კონფლიქტებისა და დევნის პრაქტიკებში ჩანს (ნიგვიზანი, წინწყარო, სამთაწყარო, ჭელა, ქობულეთი, მოხე, ბუკნარი, ქვაბიჯვარი, ადიგენი), ასევე ბათუმში ახალი მეჩეთის მშენებლობაზე უარში, რის წინააღმდეგაც მუსლიმი თემი უკვე 8 წელზე მეტია სასამართლოში იბრძვის. რელიგიური და კულტურული უფლებების სათანადო დაცვის პრობლემა აქვს სხვა ისლამურ თემებსაც საქართველოში. www.socialjustice.org.ge