珂拉琪 Collage／極樂金花 Mandalas Rain for Thee

極樂金花（Ki̍k-lo̍k Kim-hue） ＊「彼佛國土，常作天樂。黃金為地，晝夜六時，雨天曼陀羅華。」 離開 ê 彼工 Lī-khui ê hit kang 雄雄看著彼个城 Hiông-hiông khuànn-tio̍h hit ê siânn 金花搖規暝 Kim-hue iô kuì-mê 毋知敢是迷戀 M̄-tsai kám-sī bê-luân 對塗內 peh 起去 Tuì thôo-lāi peh--khit-lìh 四界爬仔爬袂停 Sì-kè pê-á pê buē-thîng 幼骨伸手探血池 Iū-kut tshun-tshiú thàm hueh-tî 想無進前佇佗位 Siūnn bô tsìn-tsîng tī tó-ūi 重新閣開始 Tiōng-sin koh khai-sí 這改袂予人買去 Tsit kái buē hōo lâng bé--khì 小可仔袂慣勢 Sió-khuá-á buē kuàn-sì 迒過生份身屍 Hānn-kuè tshenn-hūn sin-si 戇戇 tshāi 佇遐照鏡 Gōng-gōng tshāi tī hia tsiò-kiànn 花血紅顏 Hue-hiat hông-gân 驚邪風又閣吹來 Kiann siâ-hong iū-koh tshue-lâi 隨倒頭栽 Suî tó-thâu-tsai 認真感受戀愛 Jīn-tsin kám-siū luân-ài 佮學習智識 Kah ha̍k-si̍p tì-sik 糊塗拍算未來 Hôo-thôo phah-sǹg bī-lâi 無定會當生成人 Bô-tiānn ē-tàng senn-sîng lâng 每一工 行佇紅磚仔路 Muí tsi̍t-kang, kiânn tī âng-tsng-á lōo 下暗城市 霓虹伴落雨 Ē-àm siânn-tshī, Neon phuānn lo̍h-hōo 人海中 相挨相 kheh Jîn-hái tiong, sio-e-sio-kheh 拑牢伊 ê 衫 Khînn-tiâu i ê sann 若傳說沃澹我 ê 名 Nā thuân-suat ak-tâm guá ê miâ 我只想欲全心共你承咧 Guá tsí siūnn-beh tsuân-sim kā lí sîn--leh 細粒 ê 目睭貯大夢 Sè-lia̍p ê ba̍k-tsiu té tuā-bāng 門開一點仔 Mn̂g khui tsi̍t tiám-á 看著神秘 ê 未來 Khuànn-tio̍h sîn-pī ê bī-lâi 彼爿閃爍閣迷人 Hit-pîng siám-sih koh bê-lâng 恬恬講袂出聲 Tiām-tiām kóng buē tshut-siann 想東閣想西 Siūnn-tang koh siūnn-sai 想欲逐著彼个影 Siūnn-beh jiok-tio̍h hit ê iánn 金花落滿地 Kim-hue lak muá-tē 莫名開始軟跤 Bo̍k-bîng khai-sí nńg-kha 敢講 到這个坎站 Kám-kóng, kàu tsit-ê khàm-tsām 嘛無彩工？ Mā bô-tshái-kang? 佇人間借來 ê 體 Tī jîn-kan tsioh-lâi ê thé 呔會爛去？ Thài ē nuā--khì 後壁跤步聲綴真絚 Āu-piah kha-pōo-siann tuè tsin ân 狂風絞天樂 Kông-hong ká thinn-ga̍k 遍地斷籬倒壁 Piàn-tē tn̄g-lî tó-piah 就賰一步化成⋯⋯ Tō tshun tsit pōo huà sîng... (身足疼心不安) Sin tsiok thiann sim put-an (毋知愛對佗位行) M̄-tsai ài tuì tó-ūi kiânn 萬世金花 花開見佛 Bān-sè kim-hue, hue khui kìnn-hut 一念生極樂國 It-liām sing ki̍k-lo̍k kok 虛空有盡 我願無窮 Hu-khong iú-tsīn, guá guān bû-kiông 頭前是臨終西方 Thâu-tsîng sī lîm-tsiong se-hong 萬世金花 花開見佛 Bān-sè kim-hue, hue khui kìnn-hut 一念間生極樂國 It-liām-kan sing ki̍k-lo̍k kok 若虛空有盡 我願無窮 Nā hu-khong iú-tsīn, guá guān bû-kiông 頭前就是臨終西方 Thâu-tsîng tō-sī lîm-tsiong se-hong 身袂疼心不貪 Sin buē thiànn sim put tham 只要我直直仔行 Tsí-iàu guá ti̍t-ti̍t-á kiânn 攑金臺來迎接 Gia̍h kim-tâi lâi gîng-tsiap 魂脫曼陀破迷城 Hûn thuat bān-tôo phuà bê-siânn -- 作詞作曲 Composer & Lyricist／王家權 Hunter Wang 音樂編寫 Songwriter／王家權 Hunter Wang 編曲 Arranger／王家權 Hunter Wang、夏子 Natsuko 技術製作 Technical Co-Producer／柯拓名（小名）Ming Ke @Studio51 主唱 Vocalist／夏子 Natsuko 電吉他 Electric Guitarist／王家權 Hunter Wang 合聲 Backing Vocalist／夏子 Natsuko、王家權 Hunter Wang 客座樂手 Guest Player 鼓手 Drummer／賴聖文 Peter Lai 弦樂編修及演奏 Strings Rearranger & Performer／陳彥竹 Ian Chen 錄音工程師 Recording Engineer／柯拓名（小名）Ming Ke @Rebel Sound Studio 鼓組錄音室 Drum Recording Studio／Lights Up Studio 錄音助理 Assistant Engineer／于世政 Yu Shih Cheng、陳佳穎 Chia Ying Chen@Lights Up Studio 剪輯工程師 Editing Engineer／柯拓名（小名）Ming Ke @Studio51 混音工程師 Mixing Engineer／柯拓名（小名）Ming Ke @Studio51 母帶後期處理製作人 Mastering Producer／溫娜 Wenna 母帶後期處理工程師 Mastering Engineer／柯拓名（小名）Ming Ke @Studio51 曲繪 Single Artwork／夏子 Natsuko 台語歌詞顧問 Lyrics Supervisor／李勤岸 Lí Khîn-huānn 歌名及歌詞英譯 English Title & Lyrics Translator／陳韋翰 Wei-Han Chen 經紀人 Manager／小夏 Summer