Frezghi Eyob | ንወዱ ስዓምዎ | Tigrigna Gospel Song

ንወዱ ስዓምዎ  እዚ መዝሙር ካብ መዝሙር ዳዊት ምዕራፍ 2 ዝተወስደ ኮይኑ፡ ብዛዕባ ደቂ ሰባት ብትዕቢት ተነፊሖም ሰብ ምዃኖም ረሲዖም፡ አምላኽ ምዃን ዝብህግሉን፡ አምላኽ ኢና ኢሎም ንርእሶም ከም አማልኽቲ ዝቆጽርሉን ከንቱ ሐሳብ ዝግስጽ መዝሙር እዩ።  እዚ እቲ ቐዳማይ ሐጢአት ኮይኑ፡ ቅድም ንመላእኽቲ፡ ድሒሩ ድማ ንሄዋን አብ ገነት ኤደን ዘስሐተ ሱር ኩሉ ውድቀት ዝኾነ ሐጢአት እዩ። ሄዋን አምላኽ ንኽትከውን ኢላያ ነታ ፍረ ኦም ዝበልዓታ። ብዙሐት ነገስታትን፡ ስልጡናት ኢና ብሃልትን በዚ መርዚ እዚ ተለኺፎም ክፉእ አጠፍፍአ ጠፊኦም እዮም። አብቲ መወዳእታ ዘመን፡ እቲ ብጸረ ክርስቶስ ዝጽዋዕ ብኹሉ ሐይልን ስልጣንን ናይ እቲ አራዊት ተባሂሉ ዝጽዋዕ ዝወደቐ መልአኽ (ሰይጣን) ለቢሱ፡ ነዛ ሕልሚ ንምትግባር ክመጽእ እዩ። ሰባት ድማ ምስሐሳቡ ክሰምሩ እዮም። እግዚአብሄር አምላኽ ድማ እዚ ከምዝመጽእ ፈሊጡ፡ ንእትሰምዕ እዝኒ ንዘላቶ ኩሉ ካብ ጥንቲ ጀሚሩ አጠንቀቐ፡ ብእኡ ዝሰመረ ፍትዊ ወዱ ድማ እቲ መሲሕ ምዃኑን፡ እግዚአብሄር ዝቕበላ እንኮ መንፈሳዊት መንግስቲ ድማ መንግስቲ እቲ መሲሕ ጥራይ ምዃና አፍለጠ። ከመይሲ ኣብ ሰማያትን ኣብ ምድርን ኣብ ትሕቲ ምድርን ዘሎ ዅሉ ብርኪ ብስም የሱስ ምእንቲ ኺምብርከኽ፡ ልሳን ዘበለውን ንኽብሪ እግዚኣብሄር ኣቦ ኢሉ የሱስ ክርስቶስ ጐይታ ምኻኑ ኺእመን እዩ ኣምላኽ ናብ ልዕሊ ዅሉ ልዕል ዘበሎ፡ ካብ ኵሉ ስም ልዕል ዝበለ ስምውን ዝሃቦ። እታ መንግስቲ ናይ አምላኽናን ናይ መሲሑን እያ። አህዛብ ድማ ንኸንቱ፡ ብስምረት ምስቲ ገበል፡ አንጻር እግዚአብሄርን መሲሑን ድሮ ይልዓሉ አለው። እቶም ለባማት ድማ ብትሕትና አስአሰር እቲ ገንሸል አምላኽ ይኽተሉ፡ እወ ንወዲ እግዚአብሄር ይስዕሙ አለው። መዝሙር ዳዊት 110፡1 ጐይታ (እግዚአብሄር አቦ) ንጐይታይ (እግዚአብሄር ወልድ - የሱስ ክርስቶስ)፣ ንጸላእትኻ መርገጽ እግርኻ ኽሳዕ ዝገብሮም፣ ኣብ የማነይ ተቐመጥ፣ በሎ። መወከሲ፡ መዝሙር ዳዊት ምዕራፍ 2 ትምቢት ዳኒኤል ምዕራፍ 7 and 9 ወንጌል ማቴዎስ ምዕራፍ 24 2ይ ተሰሎንቄ ምዕራፍ 2 ራኢ የውሃንስ ምዕራፍ 13