SHAVKAT RAHMONOV: 19-0 BILAN G‘OYIB BO‘LGAN “NOMAD” QAYTADIMI?

Shavkat Rahmonovning faoliyati deyarli ideal ketayotgandi. 19 ta professional jang — 19 ta g‘alaba. Birorta ham mag‘lubiyat yo‘q. UFC yarim o‘rta vaznida esa u chempionlik kamariga eng yaqin turgan va barcha ehtiyot bo‘ladigan da’vogarlardan biriga aylangandi. Ammo aynan cho‘qqiga chiqishga bir qadam qolganida hammasi o‘zgardi. Shavkat oktagondan g‘oyib bo‘ldi. Bir oy yoki yarim yilga emas — deyarli ikki yilga. Va eng achinarlisi, bunga raqib emas, og‘ir jarohat sabab bo‘ldi. 2024-yil dekabrida UFC 310 turnirida Nomad Ian Machado Garryni bir ovozdan chiqarilgan hakamlar qarori bilan mag‘lub etdi. Ammo o‘sha g‘alabaning narxi biz o‘ylaganimizdan ancha qimmat bo‘lib chiqdi. Bugun esa vaziyat butunlay boshqacha. Shavkat UFC reytingida yo‘q. U bir vaqtlar ortda qoldirgan Garry chempionlik jangigacha yetib bordi. Islom Maxachev esa yarim o‘rta vazn chempioniga aylandi. Karlos Prates va Maykl Morales kabi yangi da’vogarlar divizion cho‘qqisiga ko‘tarildi. Shunday ekan, savol tug‘iladi: Shavkat qaytsa, biz yana o‘sha eski, qo‘rqinchli Nomadni ko‘ramizmi? Yoki 19-0 rekordi saqlanib qolgan bo‘lsa ham, 19-0 dagi Shavkatning o‘zi endi avvalgidek emasmi?