„ვა სოფელო, რა შიგან ხარ..." ათენიდან

„ვა სოფელო, რა შიგან ხარ..." ექსპრომტი რეპეტიციიდან. ასრულებს ათენის ვოკალურ-ინსტრუმენტალური ანსამბლი „კავკასია": გიგა ასათიანი, გიორგი განოძე, ნატალია ანთია & მამუკა ინაძე (სამხ. ხელმძღვანელი - ვოკალი, გიტარა). დიდი ქართველი მუსიკოსის, გომარ სიხარულიძის ეს შედევრი ნახევარი საუკუნის წინ დაიწერა და გაჟღერდა თავად ავტორის მიერ, ქუთაისის ლ. მესხიშვილის სახ. თეატრის სპექტაკლისათვის „ვალი". ქართველ ებრაელებისადმი მიძღვნილი ეს პიესა ეკუთვნის გურამ ბათიაშვილს, რეჟისორი გახლდათ გოგი ქავთარაძე, პრემიერა გაიმართა 1979 წელს). „ებრაელი კაცის სიმღერა, რომელიც დატოვებს საქართველო და ისრაელში - მის ისტორიულ სამშობლოში ბრუნდება. ჯერ ოჯახს უშვებს. როცა მთლიანად ცარიელდება სოფელი ებრაელებისგან ამის შემდეგ ისიც ტოვებს საქართველოს. ეს გახლავთ მოკლე შინაარსი გურამ ბათიაშვილის სპექტაკლიდან „ვალი", რომელიც ქუთაისში დადგა გოგი ქავთარაძემ. სპექტაკლი მუსიკალურად გააფორმა გენიალურმა ქართველმა კომპოზიტორმა, გომარ სიხარულიძემ. სწორედ მან დაწერა ეს სიმღერა მაშინ ქუთაისში, ამ სპექტაკლისთვის. მეორე სიცოცხლე კი ბატონი გომარის შვილმა, რეჟისორმა გიორგი სიხარულიძემ შთაჰბერა. ღმერთო როგორ მღერის, უფრო სწორად, როგორ ამოთქვამს. მეც ვერ ვუძლებ ტირილის გარეშე. ასე ტანჯვით ემშვიდობებოდა საქართველოს ებრაელი ხალხი." ამ სიმღერას, ანსამბლი „კავკასია" (უფრო დიდი შემდგენლობით) სასცენოდ ამზადებს და უძღვნის დიდი გომარ სიხარულიძის ნათელ ხსოვნას. ათენის დიასპორას ახსოვს, რომ 2015 წლის 18-21 აპრილს, სხვა ცნობილ ქართველ მოღვაწეებთან ერთად დიდი პატივი გვხვდა წილად, გვემასპინძლა ბატონი გომარ სიხარულიძისთვის. © Cultural Centre "Caucasus", Athens, Greece