【實測全新皇崗口岸！「一部閘機過三關」極速過關，三十秒內做埋人面識別，由廣東話世界變普通話，但「最後一公里」就一啲失手】 #新皇崗口岸

今朝8:20 am早繁時間，我同阿Mark特登喺元朗西鐵站搭全新直達路線B11去新皇崗口岸，親身實測一下成個流程。點知竟然荒謬哋用咗46分鐘先至去到，而最大嘅問題，就係塞喺最後嗰1公里路！ 我哋架巴士離開新田公路駛上新田交匯處嘅時候，遇上往青山公路支路嘅交通燈塞車倒灌，淨係塞上去交匯處已經塞咗15分鐘。塞完第一次之後，巴士駛落去落馬洲舊皇巴站接客，跟住需要第二次轉上新田交匯處，先至可以轉左去新皇崗口岸，結果又再塞多10分鐘。去到囗岸撞到一位喺葵芳上車嘅街坊，大家都一齊訴苦水，話最後一段路真係塞完又塞。 直覺上解決呢個問題好易，喺早繁時段大幅調整新田公路同青山公路支路交界嘅交通燈時間分配咪得囉？但係咁做，就一定輪到早繁喺青山公路揸車出市區返工嘅市民強烈反彈！ 我認為呢個問題要靠東西邊巴士線合作分流先至解決得到。其實由西邊來嘅巴士（即係屯門、元朗或者大欖隧道駛出來向皇崗方向），喺朝早繁忙時間應該避免再駛落去舊皇巴站接客，減省重複嘅車流。至於由東邊來嘅巴士（由上水、粉嶺來），本身唔需要經過青山公路支路倒灌嘅塞車，去舊皇巴站接客嘅任務應該交俾佢哋。兩邊方向嘅巴士分擔任務，避免重複車流，大家都係塞一次，時間慳得就慳！ 雖然交通安排美中不足，但去到口岸嘅過關體驗就真係非常順暢！過關用e道非常快，我今朝特登唔提早登記，去到現場閘機先即場搞，幾十秒就搞掂，指示非常清晰。過完關，1分鐘都唔使由聽廣東話變成聽普通話，感覺真係非常神奇！ 今次新口岸採用嘅「合作查驗、一次放行」模式真係值得一讚，一部閘機就可以「過三關」搞掂晒，非常高效！香港政府仲非常積極進取，以前一定要用目的地嘅證件，爭取到而家身份證同回鄉證證求其一張就得，唔使大家成日攞錯證過關。我認為呢啲咁方便市民嘅設施，應該盡快推展去唔同嘅關口。雖然我知道因為部分舊有口岸嘅物理設計同空間限制，未必咁容易做到，但好似深圳灣口岸咁，本身設計已經係同一個樓層直行直過，理應係最快可以落實到呢項安排嘅口岸，期望當局可以盡快推展！ 不過大家要注意，如果你本身過關習慣用人工通道，仲未登記e道嘅話，就必須要先去特別嘅櫃檯登記咗做e道同採樣先！完成登記之後，先至可以透過手機程式或者喺現場閘機，使用全新嘅「擦面免證通道」。 我哋會將今次實測收集到嘅交通問題向運輸署反映，爭取盡快理順過境巴士嘅行車路線同分流安排，等各位街坊日後北上出行可以更加暢順！