"يسري الصول" .. أشعل قسم الوراق قبل الثورة بـ "خطة شيطانية"!

قبل ثورة يناير بأسبوعين، الجيزة صحت على كارثة .. حريقة والعة جوه الحجز في قسم الوراق، والناس بتقول لبعضها إن المساجين بتموت، و3 آلاف بني آدم واقفين بره يحدفوا طوب وعايزين يهدوا القسم فوق دماغ اللي فيه! وورا كل اللي حصل كان شخص اسمه يسري الصول!... 📍 المكان: قسم شرطة الوراق – منطقة شمال الجيزة. ⏳ الزمان: 10 يناير 2011 🔥 الحكاية: "يسري الصول" .. أشعل قسم الوراق قبل الثورة بـ "خطة شيطانية"! 🔍 عنوان الحلقة الكاملة: "يسري الصول .. غول الوراق " الصحفيين كانوا قاعدين في نباطشية ليلية عادية في جريدة الجمهورية. شوية والدنيا اتقلبت: "انزلوا بسرعة.. فيه أهالي عايزين يقتحموا قسم شرطة الوراق!". الخبر نزل على الصحفيين المسؤولين عن ملف مديرية أمن الجيزة زي الصاعقة، لأن في التاريخ ده (10 يناير 2011) مكنش حد يتخيل إن قسم شرطة ممكن يتحاصر بالشكل ده. الصحفيين وصلوا الموقع لقوا حوالي 3000 مواطن متجمهرين في حالة غضب، وبيحدفوا طوب وزجاجات ملوتوف على مبنى القسم والاشتباكات عنيفة جداً. وقوات الأمن المركزي نزلت بسرعة وعملت جدار فاصل (حائط صد) بشري بين الأهالي الغاضبين ومبنى القسم. والقيادات الأمنية الكبيرة كلها كانت واقفة على الأرض .. مدير أمن الجيزة ومدير المباحث ومفتش المباحث، كلهم نازلين عشان يفهموا إيه اللي جنن الناس وخلاهم يروحوا يهددوا القسم. والناس عمالة تقول لبعض: "الحقوا.. قسم الوراق بيولع من جوه، وأهاليكم وعيالكم المحجوزين اتصابوا وفي ناس ماتت موتة وحشة!". الوضع جوه الحجز فعلاً كان كارثة .. المساجين مولعين نار وعاملين شغب ومستغلين الهيصة وعايزين يهربوا، والأمن بره بيمنع الأهالي تقتحم، وبيمنع المساجين جوه تهرب! مدير أمن الجيزة أخد الميكروفون ونزل وسط الناس هو ومدير المباحث وعملوا فكرة ذكية؛ جابوا كشف بأسماء كل المساجين، وطلبوا من كل أسرة تختار شخص واحد بس يدخل بنفسه جوه الحجز يطمن على قريبه ويرجع يطمن الباقيين. وبالفعل الأهالي وافقت وهديت، وعربيات المطافي دخلت طفت الحريق وانتهت الليلة المرعبة دي مع أذان الفجر على خير. وبعد ما الليلة خلصت والناس مشيت، رجالة المباحث قعدوا يحللوا اللي حصل .. ومكنتش المفاجأة في الحريقة نفسها، الصدمة لما التحريات كشفت إن الليلة دي كلها، بآلاف البشر اللي نزلوا، بالحريقة اللي ولعت، كانت خطة شيطانية موجّهة بالريموت كنترول من وراء الستار من شخص واحد بس .. اسمه "يسري الصول"! يا ترى مين هو يسري الصول ده وإيه تاريخه المرعب في عالم الجريمة؟ وإيه مصلحته إنه يحرق قسم الوراق ويجازف بحياة المساجين اللي معاه؟ وإزاي قدر يحرك 3 آلاف بني آدم في وقت واحد وهو محبوس جوه الزنزانة؟ التفاصيل كاملة مع محمد الكريتي ووائل موسى في الفيديو