АЛМАСТОРЫ I ТЕКТІЛІКТІҢ ЖАЛҒАСЫ I ЖАППАЙ КӨКПАР I ЖҰЛДЫЗДЫ ЖҮЙРІКТЕР I ҚАРА БРИЛЛИАНТ I ТӘУЕКЕЛ

Жаппай көкпардың көркін қыздырып, көпшіліктің ықыласына бөленген тұлпарлар аз емес. Солардың қатарында Қара Бриллиант пен Тәуекелдің орны ерекше. Додалы бәйгеде де, тартысты көкпарда да қайсар мінезі, ұшқырлығы мен төзімділігі арқылы талай мәрте топ жарған бұл сәйгүліктердің жеңісі – кездейсоқтық емес. Оның сыры – қанында, тегінде. Қара Бриллианттың әкесі – атақты Алмасторы. Ал Тәуекел – сол Алмасторының тұқымы, немересі. Яғни екеуін жалғап тұрған асыл қан, мықты генетика мен жүйелі селекция. Бүгінде Алмасторы белгілі атбегі әрі кәсіпкер Нұрғали Мылтықбаевтың үйірінде. Жылқының қасиетті тұқымын сақтап, асыл тұқымды көбейтуді мақсат еткен атбегі бұл іске ерекше жауапкершілікпен қарайды. Үйірге ірі денелі, қаны таза биелер қосып, Алмасторының тұқымын одан әрі өркендетуге күш салып келеді. Нұрғали Мылтықбаевтың арманы – тек бүгіннің емес, ертеңгі күннің де жеңімпаз тұлпарларын баптау. Қара Бриллианттан да асып түсетін, көкпар додасының жаңа жұлдыздарын шығару – оның басты мақсаты. Біз осы фильмде Алмасторының тарихына, оның текті тұқымына және қазақ көкпарында өзіндік із қалдырған сәйгүліктердің шежіресіне үңілдік. Бұл – бір тұлпардың ғана емес, қазақ жылқысының тектілігі мен атбегілік өнерінің сабақтастығы туралы сыр шертетін тағылымды хикая.