شنو كيطرى لمرافق المريض لكيهمل الصحة ديالو

واش عمرك سولتي راسك: شكون كيرعى الزوجة اللي كترعى المريض المسن؟ حنا فالمجتمع ديالنا، ملي كيمرض الأب أو الزوج، كنركزو على الدواء، الطبيب، الماكلة والنظافة… وهادشي كامل ضروري. ولكن كاين سؤال آخر: شكون كيسول على المرأة اللي كتحمل هاد المسؤولية نهار وليل، لسنوات؟ واش حيث هي زوجة، أو أم، أو بنت، خاصها تكون قوية ديما؟ ما تعياش، ما تمرضش، ما تحتاجش ترتاح؟ واش الصبر معناه أن الإنسان ينسى راسو؟ خليني نقول ليكم حاجة أخرى. المريض المسن ماشي غير واحد الإنسان مريض خاصنا نعطيوه الدواء ونديرو ليه كلشي. راه أب، وزوج، وإنسان عندو شخصيتو، وذكرياتو، والعادات ديالو، والحوايج اللي كيحب يدير. إلا كان باقي قادر يلبس بوحدو، ياكل بوحدو، يتحرك بأمان، أو يشارك فقراراتو… علاش نحيدو منو هاد الفرصة، غير حيث حنا بغينا نريّحوه؟ المساعدة الحقيقية ماشي هي نديرو كلشي عوض المريض. المساعدة الحقيقية هي نعاونوه يدير بنفسو كل ما يقدر عليه، ونساندوه فالحوايج اللي فعلاً ما بقاش قادر عليها. ودابا نرجعو للزوجة. إلا ولات كتقول: «عييت، ما بقيتش قادرة، بغيت غير ننعس ونرتاح»… واش الجواب ديالنا هو: «صبري، راه راجلك مريض»؟ ولا خاصنا نوقفو ونسولوها: شنو نقدروا نديرو باش نخففو عليك؟ حيت التعب المستمر، قلة النعاس، العصبية، الحزن، والإحساس بأن المسؤولية كلها فوق كتافك… هادو علامات ما خاصناش نستهينو بها. ماشي بالضرورة مرض نفسي، ولكن ممكن تكون مؤشرات على عبء الرعاية والإرهاق، وكتستحق الاهتمام. وهنا المسؤولية ماشي ديال الزوجة بوحدها. الأبناء، الأسرة، والطبيب المعالج، كل واحد عندو دور. الأبناء يقدرو يتقاسمو المواعيد الطبية، متابعة الأدوية، الزيارات، وقضاء الوقت مع الوالد. والطبيب خاصو ما يشوفش غير المرض، ولكن حتى الحالة النفسية، والاستقلالية، والظروف اللي كتعيش فيها الأسرة. والسؤال اللي بغيت نخليكم معاه هو: إلا كان الوالد ديالكم محتاج للرعاية، شكون كيرعى الشخص اللي كيرعاه؟ واش كتكتافيو بالسؤال على المريض، ولا كتسولو حتى على الزوجة أو الأم: واش نتي بخير؟ واش نعستي؟ واش محتاجة شي حد يعاونك؟ البر ماشي غير أنك تحافظ على صحة الوالدين. البر حتى هو أنك ما تخليش واحد فيهم ينهار وهو كيرعى الآخر. أنا د. أكرم الفاريسي، طبيب مهتم بطب الشيخوخة والقلب لدى كبار السن. واش فعلاً كنرعاو الأسرة كاملة، ولا غير كنرعاو المريض ونساو اللي كيرعاه؟