P180-M NGA MIAGAO MUNICIPAL BUILDING, GIN-INAGURAHAN SA PAGPANGUNA NI MAYOR RICHARD GARIN

Tuman gid ang kalipay ni Miagao Mayor Richard Garin kag sang Miagaowanon sa presensya sang mga nagtambong sa inagurasyon sang bag-o nga municipal building, ilabi na sa mga bisita nga nagpadulong gid sa ila nga banwa. Nagabalor sang P180-M ang bag-o nga Miagao Municipal Building. Ang P140-M sini ukon 78% gikan sa national government kag ang P40-M ukon 22% iya sang banwa sang Miagao. Ginbuyagyag sini nga sa iya pagpungko bilang alkalde sadtong tuig 2022, una niya nga gintsekyar ang populasyon sang ila banwa, kag una niya nga pamangkot kon san-o madoble ang populasyon, kon may 75,000 ka pumuluyo sang 2022, san-o ayhan mangin 150,000 gani iya gin-isip kag nakita niya nga yara sa tunga sang 2045 kag 2050. Masunod sini nga pamangkot kon may supisyente nga suplay sang kuryente, gina-abu-abi niya ang pagsulod sang MORE Power, may kompetisyon. Sunod diri, kon may bastante nga tubig. Indi problema ang distribusyon, ang problema yara sa suplay, ilabi na nga gina-antisipar nga mawad-an sang tubig. Ginalantaw man sini ang serbisyo sa komunikasyon, ilabi na sa tatlo ka kilometro gikan sa banwa madamo sang barangay ang wala sang komunikasyon. Sadtong 2022, masobra pulo ka dalan ang indi maagyan sang salakyan, ilabi na kon malain ang panahon. Sa subong, makaligad ang pagpaobra sa mga dalan, apat na lang ka barangay ang nabilin kag iya tinguhaan nga makumpleto antes matapos ang iya ikaduha nga termino. Bilang isa ka civil engineer, nagapati si Mayor Richard Garin nga ang mga dalan amo ang 'life-blood' sang progreso. Bangud nga naga-squat ang Miagao National High School sa Iloilo Science and Technology University (ISAT-U), ginsaylo sila kag ginpatindugan sang 4-storey, 16 classroom building ukon kabug-usan nga 96 ka classroom. Ginagamit sang MNHS sa ISAT-U ang 50 classrooms, gani ginpa-obrahan sang duha ka building nga mahimo na magamit sa bulan sang Hunyo. Duha ka building nga may 16 classrooms ukon kabug-usan nga 32 ka classrooms. Nagalaum siya nga madugangan pa gid sang 32 classrooms sa masunod nga tuig kag dugang nga 32 classrooms sa masunod pa gid nga tuig sa bulig ni Congresswoman Janette Garin. #iloilonews Ginalantaw sini ang doubling population effect, kon ano ang matabu sa shoreline sang Miagao, gani may yara sang shoreline protection nga naga-amling na, may pasyalan pa. Wala sang bastante nga espasyo sa munisipyo. Isa sa mga rason sa pagpatindog sang moderno nga municipal hall agud masabat ang pagkinahanglan sa palaabuton. Ginpabugal sini nga nagbalik ang kumpiyansa sang iya mga kasimanwa sa iya administrasyon. Pamatuod diri ang pagsaka sang income sang banwa. Pagsulod niya sang 2022, P20-M ang income, sang 2025 naglab-ot sa masobra P35-M nga local income. Indi magbayad ang tawo sang ila buhis kon wala sila salig sa gobyerno. Nakita sang pumuluyo nga may mga proyekto, ginapakay-o ang mga barangay roads, lakip ang kampo sang militar. Kon saligan ang P20-M nga local income, malab-utan sang 40 ka tuig kag matigayon ang tanan nga proyekto nga nahimo sa sulod lang sang tatlo ka tuig. Kon saligan ang income sang banwa, indi masarangan bisan ang pagpatindog sang munisipyo. Nahimo ini bangud sa damgo, nga sa isa ka adlaw may isa ka pinakamaayo nga banwa sa probinsya sang Iloilo nga amo ang banwa sang Miagao, tungod sa mga Miagaowanon. Bisan gamay ang pondo sang banwa, natigayon ang tanan sa bulig ni Congresswoman Janette Garin. #iloilonews