"ካልእ ወንጌል" - ናይ ስሕተት ምህሮ ወንጌል ብልጽግና || ብቀሺ ዶ/ር ተኽለኣብ መንግስተኣብ || 2ይ ክፋል

መካነ ህይወት መድሃኔ ዓለም ኦርቶዶክስ ተዋህዶ ቤተክርስትያን እዚ ትምህርቲ እዚ፡ ኣብ 2001 ዓ. ም. ብቀሺ ዶ/ር ተኽለኣብ መንግስተኣብ ዝተዋህበ ኮይኑ፡ ናይ ስሕተት መማህራን ዝምህርዎ ስሑት ትምህርታት እንታይ ምዃኑን፡ ብመንጽር እቲ ሓቀኛ ወንጌል፡ እቲ ስሕተት ኣብ ምንታይ ከምዝኾነን፡ ኣብቲ ኣርእስቲ ድማ፡ እቲ ሓቀኛ ምህሮ ወንጌል እንታይ ምዃኑ ብሰፊሑ ዝድህስስ ትምህርቲ እዩ። እዚ ትምህርቲ`ዚ “ካልእ ወንጌል” ብዝብል ኣርእስቲ ሒዙ ከም መጽሓፍ ኣብ 2004 ከምዝተሓትመ ክፍለጥ ይግባእ፡ መበገሲ እዚ ካልእ ወንጌል ዝብል ቃል፡ እቲ ሃዋርያ ቅዱስ ጳውሎስ ንሰብ ገላትያ ኣብ ዝጸሓፎ መልእኽቲ (ኣብ ገላ 1፡ 6-9)፡ ንኸምዚ ዝኣመሰለ ካብቲ ሓቀኛ ወንጌል ዝረሓቐ ግጉይ ትምህርቲን መረዳእታን “ካልእ ወንጌል” ኢልዎ እዩ። እዚ ድማ ሰባት ነቲ ቅኑዕ ምህሮ ወንጌል ጎይታና ካልእ ምስልን መረዳእታን ትርጉምን ብምሃብ፡ ክውስኹሉን ከጉድሉሉን ክልውጥን ብምድላዮምን እዩ ካልእ ወንጌል ዝብሎ። እዚ ትምህርቲ እዚ ኣብቲ እዋን እቲ ብተኸታታሊ ዝተዋህበ እኳ እንተኾነ፡ ካብቲ ዝተመልአ ገለ ክፋላት ግን ከምዝጠፍአ (ክርከብ ከምዘይተኻእለ)፡ ኣቐዲምና ክንሕብር ንፈቱ። ስለዚ ገለ ክፋላት ምስቲ ዝሓለፈ ለጊቡ ዝኸይድ ኮይኑ ምስ ዘይትረኽብዎ፡ ዝጎደለ ክፋል ከምዘሎ ከም ርዱእ ክውሰድ ኣለዎ ማለት እዩ። ነፍስ ወከፍ ዝቐርብ ክፋል ግን ርእሱ ዝኸኣለ ትምህርቲ ከምዝኾነ ክፍለጥ ይግባእ። እቲ መጀመርያ ዝተቐርጸሉ ኣገባብ ናይ ቀደም ተክኖሎጂ ስለዝኾነ ናብዚ ዝተዘርገሓሉ መልክዕ ንምቕራቡን ንጹርነት ናይቲ ድምጺ ንምምሕያሹን ብዙሕ ጻዕሪ ዝሓተተ ከምዝኾነን እቲ ዝከኣል ከምዝተገብረን ክንሕብር ንፈቱ። እግዚኣብሄር ይባርኽኩም!