PUK MAK LEH DANG LAM Darlung mual ṭhang thei rama puk bo thei chu.

A TAK NGEI A NI E. A chanchin tlangpui: Hei hi ATAK NGEI A NI E. Kum 1900 bawr vel daih tawhah khan sawi a awm tawh a ni awm e, mahse, hmuh a awm zui loh avangin thawnthu mai mai, a tak awm tak tak loah an ngai a ni. Amaherawhchu, 1980 hnu lamah ram vak miten he puk mak tak, mak dan chi hnih chi thum nei hi an hmu leh ta tlat mai !. Kan hriat theih chinah mi pasarih velin an hmu tawh a, heng zinga pathum hi ramvakho niin, hun khata hmu an ni a, a bak hi chuan a hran ṭheuhin, mahniin an hmu a ni. He puk mak tak mai hi a kawngka aṭanga eng lutin a chhun chin bak chu a thim phei vek a, chuvangin a hmuh thui theih loh. A chhungah hian tui a tling li lung mai a, tui thuk chin, li thuk zawng pawh hi hriat theih a ni lo. hei vang hian puk chhunah hian a luh thui theih loh a, puk thuk zawng pawh hi teh theih a ni lo a ni. An hmuh kum hi 1985 leh 1986 vek nia hriat a ni. Hetia hmu an lo awm tak hlawmah chuan sawi a lo awm ta neuh neuh a. Adventure club lamte pawin hriain an ngaihven ta hle a, a zawng turin Darlung lam an pan ta a ni. Darlung an thlen chuan YMA punin za rual vel zetin a awmna ram, mual ṭhang thei ram kham pang per, km 2 bial pawh tling mang lo tur lekah chuan an han zawng ta, a zawngtute zingah hian a hmutute ngei pawh kha an tel hlawm a ni. Mahse, ni thum lai mai, nileng ṭhak ṭhaka an zawn pawhin awm lo zawn ang mai a ni, an hmu zo lo. Tunhma aṭanga an lo sawi dan, " Khawkil bung huai thukruk," an tih ṭhin chu a tak tak ni mai awma mawi a ni.