تراجي جبل سيروا⛰️ _ الأطلس الصغير _مضايق تسليت ⬅️شلالات تيزكي⬅️قمة سيروا⬅️gas haven

تحدي جديد و قمة جديدة تنظاف إلى القائمة, تراجي قمنا بيه فشهر أكتوبر 2020. أحسن فترة لكيتم فيها جني الزعفران. جبل سيروا أعلى قمة جبلية بالأطلس الصغير بعلو 3304m، مضايق تسليت بركانية التكوين و تلوين بلاد الزعفران ، الطراجي: -من مراكش لأولوز خدينا ميني بيس ب 120 درهم الإنطلاقة كانت مع منتصف الليل. -وصلنا لأولوز من بعد 5ساعات ديال الطريق، من بعد شدينا طاكسي لتالوين المركز، درنا تقريبا ساعة فالطريق ، من تالوين كتقلب على النقل لغايديك لأسايس كاينين طاكسيات وكاينين خطافة، حنا خدينا خطاف حيت وصلنا لأسايس وزاد بينا حتال الدوار لقريب لمضايق تسليت ، ممكن تهبط للدوار على رجليك طريق مصعيباش تقريبا نصف ساعة مشي، ممكن تخيم ولكن بعيد على الدوار، ناس تما الله اعمرها دار كيرحبوا بك و كيعرضوا عليك المنتجات ديالهم من زعفران حر و كركاع باش تشريه من عندهوم بثمن معقول. المرحلة الثانية: -من مضايق تسليت الى دوار تيزكي. انطلاقة من مضايق تسليت كتدوز على الواد تبقى طالع وغادي معاه،المناظر زينة تبارك الله ، كتصادف فطريقك مجموعة من الدواوير: دوار ايت سين، ايت معروف، اساكا، فتفراوت ، تكيامت، تزكي، غادي تبقى غادي غير مع الواد مناظر رائعة، الوقت 3حتال 4 ساعات ، اخر محطة هي دوار تزكي و اللي فيه المخزن الجماعي تزكي، على بعد تقريبا نصف ساعة من الدوار كتلقاو شلال تزكي، هنا فين حطينا لطونط، بالنسبة لبغا اروفيج كاين واحد ديال سي عبدالله فدوار تزكي. ممكن تاخدوا طرونزيت كيوصلك حتال للدوار. المرحلة الثالثة: هي الطريق الى القمة الأفضل تاخد مرشد لأن الطريق كتلف ،يمكن لك تسول سي عبد الله هو يتكلف لك بيه و حتا الثمن مناسب، بالنسبة للوقت كاينة الطريق تقريبا من5 ل 6ساعات في الطلعة و 4 فالهبطة. المرحلة الرابعة: من دوار تزكي لمحطة gas haven خدينا صور وكملنا لورزازات. ملاحظة: احسن وقت للقيام بهذ الطراجي هي شهر أكتوبر _ بتصوف_