Астана қаласында пәтер иесін соққыға жыққан жалға алушы қамауға алынды

Астана қаласында пәтер иесін соққыға жыққан жалға алушы қамауға алынды. Жас жігіттің кінәсі дәлелденсе үш жылдан сегіз жылға дейін бас бостандығынан айырылуы мүмкін. Ал жанжал - қожайынның уақытылы баспананы босатуын талап еткеннен басталған. Жалпы елімізде үй иесі мен жалға алатындар арасында осындай дау көбейіпті. Мұндай жағдайда не істеу керек? Заңгерлердің кеңесі қандай? Әріптесім біліп келді. Үй иесіне қол көтерген 22 жастағы жігіттің видеосы әлеуметтік желіде тарады. Келіскен мерзімнің аяқталғанын айтып, пәтерді босатуын өтінген келіншекті жалға алушы балағаттап, қоқан-лоқы көрсетеді. Ол аздай, ұрып жіберген. Осы жағдайдан кейін полиция жігітті былапыт сөздері үшін 30 тәулікке қамауға алды. Сондай-ақ қылмыстық іс қозғады. ДАМИР ӘМРЕНОВ, Астана қаласы полиция департаменті баспасөз қызметінің аға инспекторы: Денсаулыққа қасақана зиян келтіру" дерегі бойынша қылмыстық іс қозғалды. Тексеру барысында күдіктінің пәтерді жалға алғаны, алайда оны уақтылы босатпағаны белгілі болды. Тергеу барысында күдіктіге құқықтық баға берілетін болады. Жалпы соңғы уақытта пәтерін жалға беретін азаматтар осы секілді шағыммен жиі жүгінетін болған дейді заңгерлер. Сол себепті үй иесі клиентпен мәмілесін келісімшарт арқылы бекіткен дұрыс деген кеңес береді. Яғни құжат арқылы тіпті мерзімі өтіп кетсе де, үйді босатпаған адамдардан қосымша ақы өндіруге болатынын айтады. АЗАМАТ МАРАТ, Заңгер Осы уақытыңыз аяқталғаннан кейін тағы да екі ай тұрып, содан кейін барып босатсаңыз азаматтық кодекстің 531-бабына сәйкес жалға беруші сізден осы артық тұрған екі айдың ақшасын талап ете алады. Одан кейін полиция шақырып, тұрғын үйде жалға алушы тұрып жатқанын, оның тұрғын үйді босатпай жатқандығын айтып жүгінуге болады. Әкімшілік іс қозғалады. Яғни, жанжалға тап болмас үшін пәтер иелері учаскелік полицияны ертіп барғаны дұрыс дейді мамандар. Сондай-ақ келісімшартта екі тараптың да құқығы тең сақталуы керек. Ал үй қожайыны мен жалға алушының дауы сотта азаматтық тәртіппен қаралады. #Информбюро #31арна #БастыЖаңалықтар #Новости #31канал