မျက်မှောက်ခေတ် လူအစွမ်းအား အရင်းအမြစ် စီမံခန့်ခွဲမှု ကဏ္ဍ စကားဝိုင်း အပိုင်း(၁)

မျက်မှောက်ခေတ် လူအစွမ်းအား အရင်းအမြစ် စီမံခန့်ခွဲမှု ကဏ္ဍ စကားဝိုင်း အပိုင်း(၁) အဖွဲ့အစည်းတွေ မှာ HR ရဲ့ အခန်းကဏ္ဍက ဘယ်လောက်ထိ အရေးပါလည်းဆိုတာကို Strategy First University မှာ HRM ဘာသာရပ်နှင့် HRD ဘာသာရပ် နှစ်ခုလုံးကို သင်ကြားပို့ချပေးနေသော ဆရာမကြီးဒေါက်တာ ဒေါ်ဥမ္မာမြင့် နှင့် ဆွေးနွေးဖြစ်ခဲ့ပါတယ်။ HR ရဲ့ function တွေဟာ ကုမ္ပဏီတွေအတွက် အလွန်အရေးပါတဲ့ အခန်းကဏ္ဍမှာ ပါဝင်နေပါတယ်။ HR Professional တွေဟာ ဝန်ထမ်းတွေရဲ့ ပြုမှုပုံတွေကို လေ့လာပြီး ဝန်ထမ်းတွေကို ဘယ်လို ဆွဲဆောင်မလဲ၊ ခန့်ထားမလဲ၊ ဘယ်လို ထိန်းထားမလဲ ဆိုတာတွေ အပြင် အဖွဲ့အစည်းရဲ့ မူဝါဒတွေ စည်းကမ်း တွေကို ဝန်ထမ်းတွေ လိုက်နာအောင်၊ ဝန်ထမ်းတွေရဲ့ ကိုယ်ရည် ကိုယ်သွေး တိုးတက်မှု ရှိအောင် သင်တန်းပေးခြင်း၊ အကဲဖြတ်ခြင်း၊လစာနှင့် ဆုလာဒ်များ ချီးမြှင့်ခြင်း၊ ပဋိပက္ခဖြေရှင်းခြင်းနှင့် အလုပ်သမား သမဂ္ဂဆိုင်ရာ ကိစ္စရပ်များ၊ အလုပ်သမား ဥပဒေဆိုင်ရာ သတ်မှတ်ချက် တွေကို သိရှိရမှာဖြစ်ပါသည်။ ကောင်းမွန်တဲ့ Human Resource Management နည်းလမ်းတွေ ကိုကျင့်သုံးတဲ့ ကုမ္ပဏီကတော့Google ပဲဖြစ်ပါတယ်။ HR လုပ်ငန်းတာဝန်ဟာ Google မှာ မဟာဗျူကျပြီးအရေးပါတဲ့ အလုပ်တစ်ခု ဖြစ်ပါတယ်။ အတော်ဆုံးဆိုတဲ့ လူမျိုးတွေကိုပဲ ရှာဖွေခေါ်ယူ၊ ဆက်ထိန်းထားခြင်းမျိုးတွေကို လုပ်ရင်းနဲ့ ကုမ္ပဏီရဲ့ အကျိုးဖြစ်ထွန်းစေဖို့ အလေးထားလုပ်ဆောင်ပါတယ်။ Google ဟာ ဝန်ထမ်းတွေအပေါ် အလေးထားတဲ့အပိုင်းမှာ ဆိုရင် တစ်ခြားကုမ္ပဏီ လုပ်ငန်းအများစုနဲ့ မတူကွဲပြားလှပါတယ်။ ဝန်ထမ်းတွေကို ပျော်ရွှင် အောင် လုပ်ပေးခြင်း ဆိုတဲ့ အပိုင်းမှာ Google ဟာ အကောင်းဆုံး ဆိုတာထက် ကျော်လွန်လုပ်ဆောင် ရမယ်ဆိုတာကိုပဲ ယုံကြည် ထားပါတယ်။ အတွေ့အကြုံထက် လုပ်ရည်ကိုင်ရည် အရည်အချင်းကိုပဲ ပိုအလေးထား ပါတယ်။ ဝန်ထမ်းတွေကို စိတ်ဓာတ်ခွန်အား တက်ကြွစေအောင် နှိုးဆော်ပေးနေတဲ့ အချက်ဖြစ်ပါတယ်။ Google ဆီမှာ အလုပ်တစ်ခု ရဖို့အတွက် နှစ်စဉ်နှစ်တိုင်း လူပေါင်း ၂ သန်းကျော်လောက် လျှောက်ထားနေကြပါတယ်။ အလုပ်နေရာ တစ်ခုစီတိုင်းအတွက် လျှောက်ထားသူ ထောင်ပေါင်းများစွာ ရှိပါတယ်။ Google ရဲ့ လူသစ်ခေါ်ယူခြင်း မူဝါဒရဲ့ အဓိက အလေးထားတဲ့အချက်ကတော့ လူမှန် နေရာမှန် ဖြစ်ဖို့ ဖြစ်ပါတယ်။ လူသစ်ခေါ်ယူတဲ့ အပိုင်းကို တာဝန်ယူထား သူတွေကလည်း အရည်အချင်း အင်မတန်မြင့်မားပြီး ယဉ်ကျေးမှု အရလည်း သဟဇာတ အံဝင်ခွင်ကျရှိသူတွေကိုပဲ ရွေးချယ်ခန့်ထားပါတယ်။ လူသစ် ခေါ်ယူစုဆောင်းတဲ့အပိုင်းမှာ ယဉ်ကျေးမှုကလည်း အရေးပါတဲ့နေရာမှာ ရှိနေပါတယ်။ ယဉ်ကျေးမှုအရ သင် ဘယ်လောက် သဟဇာတဖြစ်သလဲ ဆိုတာအပြင် သင်ဟာ လုပ်ငန်းထဲ ရောက်သွားချိန်မှာ ဘယ်လို အကောင်းဆုံး လုပ်ပြနိုင်သလဲ ဆိုတာတို့ကို Google က ကြည့်ရှုဆုံးဖြတ်ပါတယ်။ Google ခုလောက်ထိ အောင်မြင်မှုတွေ၊ ကျော်ကြားမှုတွေ အကြီးကြီး ရရှိထားရခြင်းရဲ့ အကြောင်းရင်းထဲမှာတော့ နည်းပညာဆိုင်ရာ လုပ်ဆောင်နိုင်မှုတွေအပြင် တီထွင်ဆန်းသစ်မှု ရှိပြီး ထိရောက်ကောင်းမွန်တဲ့ HR လုပ်ငန်းကလည်း အဓိကအဖြစ် ပါဝင်နေပါတယ်။