Utos #37 "Ibigay Kay Caesar ang kay Caesar at sa Diyos ang sa Diyos" Mateo 22:15-21

By Bro. Art Macarubbo Sa panahon ng Panginoong Jesus, ang mga Pariseo at mga Herodeo ay dalawang magkalabang grupo. Ang mga Pariseo ay galit sa pananakop ng mga Romano sa Palestino, at mga Herodeo ay suportado si Herodes (Antipas) na itinalaga ng mga Romano. Bagamat magkagalit, ang dalawang grupong ito ay nagkakaisa upang mahuli ang Panginoon Jesus sa pamamagitan ng Kanyang mga sagot. Sa pagkakataong ito, kapag ang sagot ng Panginoon ay dapat magbayad ng buwis kay Caesar, sasabihin ng mga Pariseo na lumalabag Siya sa utos ng Diyos, at kapag ang sagot naman ay “hindi,” sasabihing Siya ay nagrerebelde laban sa pamahalaan ng Roma, at maari Siyang ipaaresto. Sa sagot na ito ng Panginoon na, “Ibigay sa Diyos ang sa Diyos, at kay Caesar ang kay Caesar.” ay parehong napahiya ang dalawang grupo.