စစ်တပ် အငိုက်မိခဲ့တဲ့ မကွေးစစ်မျက်နှာ | People's Spring

စစ်တပ် အငိုက်မိခဲ့တဲ့ မကွေးစစ်မျက်နှာ ဖိုးသား/People's Spring နိုင်ငံတစ်ဝန်း ဆုံးရှုံးထားတဲ့ နယ်မြေတွေကို ပြန်ထိန်းချုပ်နိုင်ဖို့ အင်အားအများအပြားပါတဲ့ စစ်ကြောင်းတွေ နဲ့ တန်ပြန်ထိုးစစ်ဆင် နေတဲ့ အာဏာသိမ်းစစ်တပ်ကို မကွေးစစ်မျက်နှာက အံအားသင့်စေခဲ့ပါတယ်။ ၁၀၂၇ စစ်ဆင်ရေးကြောင့် အထိနာခဲ့တဲ့ စစ်တပ်ဟာ ရှမ်းပြည်နယ်၊မြောက်ပိုင်းမှာတရုတ်အကူအညီနဲ့ အပစ်ရပ်အောင်လုပ်ပြီးနောက် ပြုန်းတီးခဲ့တဲ့အင်အားတွေအတွက်စစ်မှုထမ်းတပ်သားသစ်တွေကိုစစ်တပ်ထိန်းချုပ်ဒေသတွေကနေ ပုံစံအမျိုးမျိုးနဲ့ စုဆောင်းခဲ့ပါတယ်။ အဲဒီနောက်ပိုင်း ‌တော်လှန်ရေးအမာခံနယ်‌မြေတွေ ဖြစ်တဲ့ စစ်ကိုင်း၊မကွေး၊ မန္တလေး၊ ချင်း ၊ကချင် ၊ရခိုင်ပြည်နယ်အစပ်အစရှိတဲ့ ဆုံးရှုံးထားတဲ့ဒေသတွေကိုအာဏာသိမ်းစစ်တပ်က တန်ပြန်ထိုးစစ်ဆင်ပါတယ်။ ၂၀၂၅ ခုနှစ်မှာ နောင်ချိုကစပြီး စဉ့်ကူး ၊သပိတ်ကျင်း ၊တကောင်း ၊ မိုးကုတ် ၊မိုးမိတ် ကနေ ၊ဖလမ်း ၊အင်းတော် စသဖြင့် ဆုံးရှုံးခဲ့တဲ့ မြို့တွေကို ပြန်ထိန်းချုပ်နိုင်ပြီးတော့ စစ်တပ်က စစ်ရေးမှာ သိသိသာသာပြန်လည် ဦးမော့လာပါတယ်။ ဒါကြောင့် အာဏာသိမ်းခေါင်းဆောင်မင်းအောင်လှိုင်က သမ္မတခေါင်းပေါင်း ဝတ်ပြီး ရက် ၁၀၀ စီမံချက်ဆိုပြီး ဆုံးရှုံးထားတဲ့နယ်မြေတွေထဲက စစ်ရေးအရအချက်အချာကျတဲ့ ဒေသတွေကို ထပ်မံထိုးစစ်ဆင်လာပါတယ်။ စစ်မှု မထမ်းမနေရ ဥပဒေနဲ့ စုဆောင်းထားတဲ့ ၊ပေါ်တာဆွဲထားတဲ့ စစ်သားသစ်အင်အားထောင်ချီသုံး ပြီး မင်းတပ်၊ ကန်ပက်လက် ၊ ဗန်းမော် ၊ ကလေး-တမူး လမ်းပိုင်းနဲ့ ခမ်းပါတ်မြို့ ၊ မဘိန်းမြို့ ၊ ရခိုင်ပြည်နယ် နဲ့ ဆက်စပ်ဒေသတွေက ဆုံးရှုံးထားတဲ့ဒေသတွေကို မေလနဲ့ ဇွန်လတွေမှာ တန်ပြန်ထိုးစစ်ဆင်လာပါတယ် ။ ချင်းပြည်နယ်မြောက်ပိုင်းကမြို့တွေပြန်သိမ်းဖို့စစ်ကိုင်းတိုင်း ကလေးမြို့ဟာစစ်တပ်အတွက်အဓိကထောက်ပံ့ရေးလမ်းကြောင်းတစ်ခု ဖြစ်ခဲ့သလို လက်ရှိ တိုက်ပွဲ ပြင်းထန်နေတဲ့ ချင်းပြည်နယ်တောင်ပိုင်းကမြို့တွေအတွက်မကွေးတိုင်းဆောမြို့နယ်က တံခါးပေါက်တခု ဖြစ်ပါတယ်။ တော်လှန်ရေးအဖွဲ့တွေရဲ့စစ်ဘက်ဆိုင်ရာထောက်လှမ်းမှုတွေအရ မေလ ကနေ ဇွန် ပထမပတ်အထိ တစ်လကျော်အတွင်းမှာပဲ ဆောမြို့နယ်ထဲကိုစစ်တပ်အင်အား ၂,၀၀၀ ဝန်းကျင်ရောက်လာခဲ့ပါတယ်။ အဲဒီစုပေါင်းစပ်ပေါင်းအင်အားထဲမှာရှမ်းအရှေ့နဲ့ မြောက်ပိုင်းအ‌ခြေစိုက်တပ်ရင်း တချို့လည်းပါဝင်တယ်လို့ တော်လှန်ရေးတပ်ဖွဲ့တွေဆီထွက် ပြေးလာတဲ့ စစ်တပ်စစ်ကြောင်းထဲက စစ်မှုထမ်းစစ်သားသစ်တွေက ထွက်ဆိုထားပါတယ်။ စစ်တပ်စစ်ကြောင်းရွေ့လျားမှုတွေက ဆိပ်ဖြူမြို့နယ်ထဲက ကာကွယ်ရေးပစ္စည်းစက်ရုံ (ကပစ ၂၁ နဲ့ ၂၂) စက်ရုံတွေကို မန္တလေး၊ မိတ္ထီလာ နဲ့ ကျောက်ပန်းတောင်ကတဆင့် ကနဦး အင်အားဖြည့်ခဲ့ပါတယ်။ အဲဒီကနေပြီးပေါက်မြို့နယ်ကပစ (၂၄) နဲ့ လောင်းရှည်မြို့ ကပစ (၂၅ )ကို တပ်တွေ ဖြန့်ခွဲခဲ့တာဖြစ်ပါတယ်။ဆောမြို့နယ်၊လောင်းရှည်မြို့က တပ်တွေက ဆောမြို့တွင်းကိုဝင်ပြီး ချင်းပြည်နယ်ကန်ပက်လက်မြို့ကို စစ်ကြောင်းထိုးနေပါတယ်။ အလားတူပဲ ပေါက်မြို့နယ်စစ်ကြောင်းက ပေါက်-ကျောက်ထု လမ်းအတိုင်းဆောမြို့နယ်၊ကျောက်ထုမြို့အခြေစိုက် အမြောက်တပ်အမှတ် (၃၆၈) မှာ စုဖွဲ့ပြီး ချင်းပြည်နယ်မင်းတပ်မြို့ကို ထိုးစစ်ဆင်နေလို့ တိုက်ပွဲပြင်းထန်နေပါတယ်။ ဒါပေမယ့် ထူးခြားတာကစစ်တပ်ရဲ့ အင်အားဖြည့်တင်းမှု ထောက်ပံ့ရေးလမ်းကြောင်း ပြောင်းလဲမှုဖြစ်ပါတယ်။ ပြီးခဲ့တဲ့နှစ် အထိ ပေါက်မြို့နယ်ကို စစ်တပ်ယာဉ်တန်းတွေပို့ဖို့ ပခုက္ကူ-ကမ္မ- ပေါက်လမ်းပိုင်းကိုပဲ စစ်တပ်ကအဓိကသုံးခဲ့ပါတယ်။ ဒါပေမယ့် ၂၀၂၅ ခုနှစ် ဇွန်လက ပခုက္ကူမြို့ကနေ ပေါက် မြို့နယ် ကပစ(၂၄)ကိုသွားခဲ့တဲ့ ကားအစီးရေ ၁၀၀ ကျော်ပါ စစ်ယာဉ်တန်းက မိုင် ၄၀ ကျော်ပဲဝေးတဲ့ပေါက်မြို့ကိုသုံးလဝန်းကျင်ကြာမှ ရောက်ခဲ့ပါတယ်။ဒေသခံတော်လှန်ရေးအဖွဲ့တွေရဲ့နယ်မြေစိုးမိုးမှု နဲ့ ခုခံနိုင်စွမ်းကို ပြသတဲ့အခြေအနေတစ်ခုဖြစ်ပြီး အာဏာသိမ်းစစ်တပ်ထောက်ပံ့ပို့ဆောင်ရေးကိုတုံ့ဆိုင်း စေခဲ့ပါတယ်။ ဒါကြောင့် သဘာဝအရံအတားတွေနဲ့ လမ်းမိုင်အကွာအဝေးအားဖြင့် မိုင် ၂၀ နီးပါး ပိုရှည်ပေမယ့် ခုခံတိုက်ခိုက်မှု ပိုနည်းနိုင်မယ့်ချောက်- ဆိပ်ဖြူ-ပေါက်လမ်းပိုင်းကို စစ်တပ်က ၂၀၂၆ ခုနှစ်ကစပြီးအသုံးပြုခဲ့တာလို့ မကွေးတိုင်း စစ်ရေး‌တာဝန်ရှိသူတချို့ကသုံးသပ်ပါတယ်။ မကွေး နဲ့ ချင်းပြည်နယ် အစပ်ဒေသတွေတင်မကပဲ မင်းတပ် ၊ကန်ပက်လက်စတဲ့ ချင်းပြည်နယ်မြောက်ပိုင်းကဆုံးရှုံးနယ်မြေတွေကိုပြန်ထိန်းချုပ်နိုင်ဖို့ စစ်တပ်က အင်အားထောင်ပေါင်းများစွာကို မကွေးတိုင်းကနေ ဖြည့်တင်းခဲ့ပါတယ် ။ "အရှိန်အဟုန်နဲ့သွားရမယ့်အခြေအနေက ဒီကြားထဲမှာတန့်သွားသလိုဖြစ်နေခဲ့ပေမယ့် ကျွန်တော်တို့ရဲ့ တန်ပြန်ထိုးစစ်ဆင်မှုတွေ ကို စောင့်ကြည့်ရပါတော့မယ်"လို့မကွေးတိုင်းက တော်လှန်ရေးရဲဘော်တစ်ဦးကပြောပါတယ်။ ချင်းပြည်နယ်မှာ စစ်တပ်စစ်ကြောင်းတွေဟာတော်လှန်ရေးတပ်တွေရဲ့ဖြတ်တောက်ပိတ်ဆို့တိုက်ခိုက်မှုကြောင့် ရှေ့မတိုးနိုင်တာ ၊ ရခိုင်ပြည်နယ် နဲ့ ရခိုင်ပြည်နယ်အစပ်မှာညစစ်တပ်အထိနာနေတာ ၊စစ်ကိုင်းတိုင်းနဲ့ ကချင်ပြည်နယ်အစပ် တိုက်ပွဲတွေမှာ စစ်တပ်အထိနာနေတာ ၊မကွေးတိုင်းမှာ စစ်တပ်အငိုက်မိခဲ့တဲ့တိုက်ပွဲတွေဟာ တော်လှန်ရေးတပ်တွေဘက်က စစ်ရေးပြန်လည် ဦးမော့ လာမှုရဲ့ အစဖြစ်တယ်လို့ NUG ပြည်ထဲရေးဝန်ကြီး ဦးကျော်နီ ကသုံးသပ်ပါတယ်။ ။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #မကွေးစစ်မျက်နှာ #အညာမြေစစ်ဆင်ရေး #ကုက္ကိုလ်စုတိုက်ပွဲ #ရေပြာစဲစခန်းသိမ်းပိုက်မှု #OperationSu #MagwayFrontline #Operation945 #KokkoSuBattle #မကွေးတိုင်းသတင်း #ပခုက္ကူ #ပေါက်မြို့နယ် #ချင်းပြည်နယ် #မင်းတပ်_ကန်ပက်လက် #MagwayRegion #PakuKku #PaukTownship #ChinState #ပြည်သူ့ကာကွယ်ရေးတပ်မတော် #ပကဖ #NUG_MOD #စခန်းသိမ်းတိုက်ပွဲ #PeoplesDefenseForce #PDF #NUGBurma #AntiJuntaOffensive #SpringRevolutionMyanmar #နွေဦးတော်လှန်ရေး #မြန်မာ့အရေး #WhatsHappeningInMyanmar #MyanmarMilitaryJunta #CivilWarMyanmar #RejectMilitaryCoup